Autobuses para participar na manifestación de Cangas del Narcea pa desixir l’absolución de los 5 mineros de Zarréu y los 2 de L.laciana

AUTOBUSES A LA MANIFESTACIÓN DE CANGAS

EL COMITÉ DE SOLIDARIDÁ COLOS 5 MINEROS DE ZARRÉU Y ASTURIES EN PIE VAN TAR NA MANIFESTACIÓN DE CANGAS DEL NARCEA PA DESIXIR L’ABSOLUCIÓN DE LOS 5 DE ZARRÉU Y LOS 2 DE L.LACIANA

AUTOBUSES:

16:30 h.: La Gota Llechi (plaza L’Humedal). Xixón.

17:00 h.: Llocal de la CSI. C/ Hermanos Menéndez Pidal 14. Uviéu.

El billete d’ida y vuelta va costar 5 € pa quien pueda pagalu. Ye necesario facer reserva nel teléfonu 985 35 42 63, apurriendo’l nome y el llugar de salida.

Los 5 mineros de Zarréu fueron condergaos a 2 años y mediu de prisión por socorrer a los sos compañeros accidentaos, dempués de qu’una actuación neglixente ya irresponsable d’ún de los capataces de la empresa nel orixe l’accidente y la so actuación posterior, al marxe los servicios mélicos, punxera en pelligru la vida de estos trabayadores.

Incumplir toa norma prevención y seguridá llaboral, despreciando la vida de los y les trabayadores, nun tien castigu dalgún. Sicasí, socorrer a los trabayadores accidentaos y ponelos en manos de los servicios mélicos, castígase cola cárcel.

Actuaciones irracionales como “disparar” con goma-2, con trés trabayadores atrapaos na mina, amenaciar a los trabayadores accidentaos con despidilos si denunciaben l’accidente o tresportalos nun vehículu ensin autorizar hacia los vestuarios, en llugar de llevalos a un centru mélicu, nun merecen, siquier, una investigación si quien lo fai ye un capataz de la empresa.

Pero si yes un trabayador y pones fin a esta llocura, dexando a les persones accidentaes en manos de los servicios mélicos, la Xusticia nun va tener problemes en condergate a prisión.

Quieren zarrar na cárcel a quien socorrieron a los trabayadores accidentaos ya indemnizar a quien punxeron en peligru la vida de dichos trabayadores. Les alternatives que nos dexen son siguir morriendo nel puestu trabayu o acabar na cárcel por intentar torgalo.

Anguaño, la sentencia de 2 años y mediu de prisión pa los 5 mineros de Zarréu, atópase recurrida énte l’Audiencia Provincial.

Pero queremos salir al pasu d’un tracamundiu que paez tar creándose. La sentencia de 2 años y mediu nun ye por un delitu d’agresiones al capataz de la empresa. L’agarradiella que tuvo llugar con esti capataz namás foi calificáu como una falta de mancadures, merecedora de 12 díes d’arrestu domiciliariu, por cuenta de que, como almitió’l forense demientres el xuiciu y como na mesma sentencia s’afita, “nun precisó de dengún tratamientu curatible”.

La sentencia de 2 años y mediu respuende a la responsabilidá d’un delitu d’atentáu a l’autoridá, nesti casu, a los axentes de la Guardia Civil presentes naquel escenariu. Sicasí, tantu les declaraciones de los axentes de la Guardia Civil, como la mesma sentencia, nieguen que se produxeren acometimientos directos, esto ye, agresiones físiques a los guardias civiles, polo que l’atentáu a l’autoridá amenórgase a una actitú de simple desobediencia ante les ordes d’estremase del vehículu nel que se treslladaba a los trabayadores accidentaos.

La conderga de 2 años y mediu de prisión débese, puramente, a que los 5 mineros de Zarréu ñegáronse a alloñase del vehículu nel que’l capataz de la empresa pretendía llevar a los trabayadores accidentaos a los vestuarios y non a los servicios mélicos, como yera la so obligación.

Y lo que yá resulta incomprensible ye que nin la Direición Rexonal de Mines nin la Inspeición de Trabayu se dignaren a entamar denguna triba d’investigación sobre les causes del accidente. De fechu, nin siquier lu tienen calificáu como accidente, sinón como un simple incidente.

Por esa razón, creemos imprescindible que s’entame una investigación fondera sobre les causes del accidente de la mina Zarréu, que s’asoleye lo que verdaderamente pasó aquel día y se depuren les responsabilidaes penales que remanezan, tantu pa la empresa como pal mesmu capataz.