L’ayuntamientu de Xixón aplica a la CSI la llei mordaza, enantes de qu’entre en vigor

L’Ayuntamientu Xixón intentó prohibir la rueda de prensa convocada pola CSI pa faer la presentación pública del documentu “Pa Entamar”, como propuesta a los partíos y coaliciones electorales y al conxuntu’l Pueblu Asturianu.

La Policía Municipal obligó a retirar la mesa ya identificó a dos miembros de la Executiva de la CSI, aplicando la normativa de la Llei Mordaza, anantes de qu’entre en vigor. Y too ello, en plena campaña eleutoral, onde se supón que la llibertá d’espresión y opinión deberíen de tar garantizaes percima cualesquier otra considerancia.

Sicasí, los y les voceres de la CSI cellebraron la rueda prensa y presentaron la propuesta “Pa Entamar”, ellaborada poles y polos militantes de la CSI como una ferramienta pal alderique y l’avance na defensa los derechos de la clas obrera asturiana.

Asina mesmu, la CSI quier faer llegar estes propuestes a tolos partíos, organizaciones y coaliciones que se presenten a les vinientes eleiciones municipales y autonómiques, asina como a la sociedá asturiana, coles mires de que sían incluyíes nos sos programes eleutorales y, darréu, desenvueltes nos sos programes de gobiernu.