1 de Mayu manifestación “Nun hai mordaza que valga”

ESCONTRA’L PARU Y LA PRECARIEDÁ, ESCONTRA LA CORRUPCIÓN Y LA REPRESIÓN, NUN HAI “MORDAZA” QUE VALGA.

ENTAMEN: CORRIENTE SINDICAL D’IZQUIERDA (CSI), CXT, SUATEA.

Un trabayu dignu, una vivienda, un hospital, una escuela, la universidá, inclusive les medicines, la eletricidá o’l gas, entamen a tornase en luxos que los y les trabayadores yá nun podemos permitinos. Hasta los mesmos alimentos dexaron de tar garantizaos pa toos y toes.

Mentantu, el dineru que precisamos pa sobrevivir súmese poles alcantarielles de la corrupción, les estafes de la banca y los abusos de los grandes empresarios.

Pero les cárceles balérense de corruptos y enllénense con quien defenden y lluchen polos nuesos derechos más básicos. La conderga a prisión de los 5 mineros de Zarréu, por socorrer a los sos compañeros accidentaos, pon en cuestión, inclusive, el nuesu derechu a salir con vida del trabayu.

Y pa que nin siquier podamos protestar, la Llei Mordaza va tornar la nuesa sociedá nun campu concentración onde cualisquier forma de contestación puede empobinanos a la cárcel.

Pa echa-y la galga a esto, les y los trabayadores nun podemos confialo too a una urna, yá sía política o sindical. Precisamos otra forma de defender los derechos obreros, otra forma de faer sindicalismu.

Un sindicalismu asambleariu, pa que los y les trabayadores decidan de forma direuta. Pa que naide decida por nós.

Un sindicalismu ensin lliberaos nin subvenciones. Ensin vender los nuesos puestos de trabayu. Ensin aceutar nin roblar nin un despidu nin un pieslle d’empresa más. Un sindicalismu ensin claudicaciones, ensin corrupción y ensin traiciones.

Un sindicalismu que los y les representantes, voceros y voceres defendan los derechos de los sos compañeros y compañeres y non los intereses d’unes direiciones sindicales que yá nun pueden atropar más corrupción y más fracasos y que la so dimisión yá ye un clamor en toa Asturies.

Con estes bases, vamos construyir un sindicalismu estremáu, que defenda los derechos de la clas obrera y eche fuera lo que nos sobra: el capitalismu, los sos gobiernos, la so banca y la so patronal.