Manifestación escontra les pirvatizaciones nel ERA y por unos servicios públicos y de calidá

CSI-ERA

Coincidiendo colos 300 díes d’enzarru (y con estes feches tan pintoresques), les y los trabayadores del ERA, vamos dir en procesión, el viniente xueves 26 de marzu, dende la Residencia Mista de Pumarín hasta la Casa’l Pueblu de Xixón (see’l PSOE), desixendo a esti Gobiernu, que nin escucha nin quier faelo, que dexe de faltar a la verdá, que lo qu’ellos llamen ESTERNALIZAR nun ye otra cosa qu’una llenta y sibilina PRIVATIZACIÓN de servicios (pero de manual, vaya)

Empezamos esti enzarru, hai 10 meses, lluchando por 7 places que quedaren vacantes por xubilación y, agora, tres el concursu tresllaos que sacaron a primeros d’esti añu, sumamos otres 15 más, en total 22 places que quieren echar al calderu.

Que dexen d’enguedeyar a los medios y a la opinión pública, que llamen a les coses pol so nome y tengan agalles pa dicir, d’una vegada por toes, que lo que pretenden ye cargase toles categoríes del Grupu E d’un plumazu, que’l PARTÍU SOCIALISTA ta faciendo n’Asturies lo mesmo que critica en Madrid de Raxoy, que tán vendiendo y precarizando l’Empléu y los Servicios Públicos.

Con un Xerente al que les y los trabayadores y el Comité d’Empresa consideren yá como interlocutor NON VÁLIDU pa la negociación de diches places, pola so falta de compromisu y seriedá (ente tres coses), una Conseyera qu’a día de güei nun sabe perbién de qué va “la milonga esta de los del ERA” y un Presidente de Gobiernu Rexonal que “si te vi nun m’alcuerdo”, nun queda otra que salir a les cais hasta qu’en mayu tengan que ponese a faer les maletes.

¡DEXÁI DE VENDER LO QUE NUN YE VUESU!. ¡LO PÚBLICO YE DE TO@S!.

¡POR UNOS SERVICIOS PÚBLICOS Y CALIDABLES!.