Convocatoria de les Asamblees de trabayadores en llucha n’Asturies

El “Gobiernín Rexonal” tiennos crucifica@s.

Aprovechando la cellebración del caberu plenu del “Parlamentu Regional” anantes de les vinientes eleiciones, les Asamblees de Trabayadores en Llucha n’Asturies vamos concentranos a les 6 de la tarde del xueves 19 marzu, frente a la Xunta Xeneral, pa denunciar la nefasta actuación del “Gobiernu Regional” alrodiu la situación llaboral y social d’Asturies, con más de 100.000 paraos y paraes, continuos despidos y pieslles d’empreses.

Dende les Asamblees de Trabayadores en Llucha n’Asturies, siguimos denunciando la falta compromisu del “Presidente del Principado”, Javier Fernández, del so Gobiernu y del partíu al que pertenez (PSOE), clos y coles trabayadores que lluchen polos sos puestos de trabayu y pol futuru d’Asturies.

En munchos casos, cola so política de privatizaciones y de sofitu a quien tán pesllando empreses y despidiendo trabayadores , el “Gobiernu del Principado” ye un cómpliz direutu de l’angustiosa situación de tantes families asturianes a les que quita de la posibilidá d’una vida digna.

Pa denunciar la nuesa situación y pa desixir un compromisu real de los políticos asturianos na solución de los conflictos que tamos sufriendo, les Asamblees de Trabayadores en Llucha n’Asturies, vamos realizar una crucifixón simbólica frente a la Xunta Xeneral del “Principado de Asturias”, el xueves, 19 marzu, a les 6 de la tarde.