La TSXA da la razón a los y les ex-trabayadores del Plan Enserta que denunciaron la so contratación en fraude de llei

Recientemente’l Tribunal Superior de Xusticia d’Asturies ratificó la improcedencia del despíu de dellos y delles trabayadores del Plan INSERTA 2013 del Ayuntamientu Xixón que denunciaron ser despedíos improcedentemente yá que la contratación que se-yos fizo, baxo la forma de “Obra o serviciu”, foi en fraude de Llei y-a que realizaben xeres y actividaes propies de l’Alministración Pública.

El TSXA amás desestima’l recursu que nel so día punxo l’Ayuntamientu contra les sentencies dictaes pola Sala de lo Social 2 de Xixón, que reconocía amás que estos y estes trabayadores teníen derechu a indemnización ateniéndose al Conveniu del Personal Llaboral del Ayuntamientu, y non al Conveniu del Plan Innova, vixente pal personal contratáu nestos Planes d’Empleu. Asina, les indemnizaciones a percibir por esti grupu de trabayadores vénse incrementaes alrodiu un 40% de media respectu a les pretensiones que tinía l’Ayuntamientu.

Dende la CSI congratulámonos que los tribunales nos dean, una vegada más, la razón. El viniente pasu que daremos sedrá entamar les demandes en reclamación de cantidá poles cantidaes non percibíes durante l’año trabayáu por esti grupu de trabayadores, lo que va efectuase nes próximes selmanes.

Queremos resaltar que foi la CSI, y nada más que la CSI, la que se punxo a disposición de les y los trabayadores pa denunciar esti nueu atropellu contra los derechos de la clase obrera. Foi la nuesa sección sindical nel Plan INSERTA la que empezó a movilizar a los y les trabayadoras pa que defendieren los sos derechos y foi’l nuesu sindicatu quien punxo a la so disposición los sos servicios xurídicos pa que llevaren alantre tol procesu llegal contra la contratación en fraude de Llei. Primero CCOO y UGT, y agora USIPA, muéstrense hipócritamente escandalizaos pol atropellu que se fizo a estos y estes trabayadores, cuando son perfechamente conocedores de la situación dende fae años.

Estos y estes trabayadores nun fueron los primeros en ser contrataos en fraude de Llei nun Plan d’Empleu nin fueron los últimos, yá que pesie a les primeres sentencies en contra l’Ayuntamientu siguió empecináu en contratar en fraude de Llei, situación na que se atopen les y los contrataos nos Planes d’Empleu 2014. Conocedores d’ello estos sindicatos nun mostraron dengún interés nin apoyu a los y les trabayadores de los Planes d’Empleu, llegando a dase’l casu incluso de que CCOO, ún de los firmantes del Plan Innova que recueye’l Conveniu que regula estos planes d’empleu, negó los sos servicios xurídicos a trabayadores que lleven años afiliaos a esi sindicatu y queríen denunciar la so contratación en fraude de Llei. Paez que n’añu d’ellecciones sindicales, y tres recibir dellos varapalos xudiciales l’Ayuntamientu y quedar al descubiertu la so nefasta política de contratación llaboral ye cuando estos sindicatos aparenten defender los derechos de la clase trabayadora. Hasta que pase’l temporal, dempués volverán a les sos práctiques nocives contra los intereses de los y les trabayadores, una vegada más.

Por último, anunciar que dende la CSI, una vegada más, convocaremos nel so debíu momentu a los y les trabayadores que tán aanguañu contrataes nos Planes d’Empleu pa informa-yos de la so situación llegal y pa que entamen les acciones necesaries pa que se vean reconocíos los sos derechos llaborales.