Un nuevu y grave incidente provoca’l zarru de la piscina municipal avilesina de la Magadalena mientres delles hores

CSI-AYUNTAMIENTU D’AVILÉS

La Seición Sindical de la Corriente Sindical d’Izquierda nel Conceyu d’Avilés volvió denunciar, énte Inspeición de Trabayu, un nuevu y grave incidente que provocó’l zarru la piscina municipal de La Madalena demientres delles hores.

Per tercer vegada nun periodu d’una selmana, la maquinaria d’aireación y ventilación de la piscina La Madalena sufrió un parón que provocó una ñube irrespirable en tola instalación, faciendo necesariu’l pieslle la piscina.

Y otra vegada, como nos anteriores accidentes, fueron los mesmos y les mesmes trabayadores quien dieron l’alarma y procedieron al zarru la piscina, ensin que’l Serviciu Prevención del Conceyu se dignara, siquier, a apaecer peles instalaciones.

Una vegada que l’ambiente fíxose respirable, a les 11:40 h. procedióse a la reapertura la piscina. Sicasí, alrodiu les 14:30 h., la maquinaria tornó parase ensin que se comunicare nada nin al personal presente en piscina nin al públicu, volviendo zarrase la piscina definitivamente a les 15:30 h. Pero d’esti pieslle definitivu nun fueron informaos nin el socorrista nin el monitor de natación, que siguieron trabayando dientro les instalaciones, ún nel so puestu socorrista y otru dando clas a les sos alumnes del cursu de les 15:00 h., hasta qu’acabó la clas a les 15:45 h.

D’esta forma, al riesgu qu’estos fechos suponen pa la salú de los y les trabayadores, améstase’l riesgu al que, de forma neglixente ya inconsciente dafechu, espúnxose a les alumnes usuaries de la piscina.

Pa los responsables de la CSI nel Conceyu d’Avilés “nes piscines municipales d’Avilés ta reproduciéndose’l mesmu escenariu que nos llevó al pasáu accidente por intoxicación de cloru, que dexó mancaos pa tola vida a dos trabayadores y supunxo al Conceyu y a les aseguradores, un desembolsu averáu a los 400.000 €, en conceutu d’indemnizaciones y recargu prestaciones”.

Na CSI camentamos que nun se puede siguir tolerando la impunidá dafechu de los responsables municipales de les piscines. Tolos díes se produz dalgún incidente grave, la nuesa salú deteriórase día ente día demientres que los responsables municipales y el Serviciu Prevención nin tán nin se-yos espera; paez que nun va con ellos. ¿A qué tán esperando pa poner soluciones a too esto?, ¿a qu’asoceda otra intoxicación?, ¿a que se produza dalguna muerte?”.

Pa la CSI ye imprescindible tener en cuenta que los y les trabayadores de les piscines municipales comparten espaciu colos usuarios y usuaries, polo que los problemes de salú llaboral tórnense nun problema de Salú Pública qu’afeuta, tamién, a tolos avilesinos y avilesines, incluyíos los grupos escolares qu’utilicen les instalaciones.