La CSI vuelve a denunicar ente inspección de trabayu’l deterioru de les condiciones de salú llaboral nes piscines municipales d’Avilés

El responsable de la Seición Sindical de la Corriente Sindical d’Izquierda nel Conceyu d’Avilés tornó a denunciar, per enésima vegada, ante Inspeición de Trabayu, nuevos casos de fallos mecánicos nes instalaciones de les piscines municipales avilesines, que siguen poniendo en pelligru la salú de los y les trabayadores, lo mesmo que de los usuarios y usuaries de diches piscines.

El pasáu miércoles, 18 febreru, la maquinaria d’aireación y ventilación de la piscina de La Madalena sufrieron un parón que provocó la falta renovación d’aire.

Arriendes d’ello, les condiciones ambientales de la piscina disparáronse, llegando a superar el 80% d’humedanza relativa nel aire, coles consecuencies inmediates qu’estes condiciones tienen pa la salú.

A pesar de les repitíes afirmaciones de los responsables municipales alrodiu la esistencia d’automatismos qu’imposibiliten qu’estos fechos asocedan, tuvieron que ser los mesmos trabayadores quien dieron l’alarma, hasta qu’un téunicu caltenimientu de la empresa Giroa, allegó al centru de trabayu pa informar de que la incidencia yá taba iguada.

Sicasí, al otru día, 19 febreru, los fechos repitiéronse esactamente igual que’l día anterior, superándose los niveles d’humedanza relativa nel aire, que llegó al 93 %.

Dende la CSI queremos destacar que dengún responsable municipal nin, lo que ye peor, dengún responsable del Serviciu Prevención del Conceyu d’Avilés, apaeció en dengún momentu nin pa comprebar la situación de la piscina nin pa verificar l’estáu de salú de los y les trabayadores, usuarios y usuaries presentes na piscina municipal.

Y tou ello produzse dempués de decenes de miles d’euros gastaos n’obres nes piscines municipales, que diben garantizar la “eficiencia enerxética” nes piscines municipales y dempués de qu’el mesmu Conceyu fuera declaráu responsable, por sentencia xudicial firme, del accidente por intoxicación de cloru na piscina de La Madalena, que dexó mancaos pa tola vida a dos trabayadores y supunxo al Conceyu y a les aseguradores, un desembolsu averáu a los 400.000 €, en conceutu d’indemnizaciones y recargu prestaciones.