Concentración de sofitu a los 5 mineros de Zarréu condergaos a presión, na presentación del recursu d’unu d’ellos (Toño, militante de la CSI)

CONVOQUEN: CORRIENTE SINDICAL D’IZQUIERDA, ¡ASTURIES EN PIE!

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME, LLAR LA LLEGRA, DARRÉU).

El próximu martes 3 de febreru, a les 12:30 h., vamos acompañar a Toño, militante de la CSI y ún de los 5 mineros condergaos a 2 años y mediu de prisión, na presentación del so recursu énte l’Audiencia Provincial d’Uviéu.

El pasáu 12 xunetu de 2012 tuvo llugar un accidente llaboral na Mina de Zarréu, nel que se vieron afectaos trés trabayadores.

L’actuación neglixente ya irresponsable d’ún de los capataces de la empresa, nel orixe l’accidente y la so actuación posterior, al marxe los servicios mélicos, punxo en peligru la vida d’estos trés trabayadores.

Cientos de persones, compañeros de trabayu y vecinos y vecines, allegaron al llugar de los fechos, interesándose pol estáu de salú de los trabayadores accidentaos y denunciando la forma de proceder del capataz ente’l grave accidente que se produxere.

Los compañeros de trabayu y los vecinos y vecines de l’arrodiada qu’allegaron al llugar del accidente, torgaron que’l capataz siguiere cola so irresponsable actitú, poniendo a salvo a los trés trabayadores afeutaos y dexándolos nes manes de los servicios d’ambulancia.

Por aquellos fechos, Toño y otros cuatro trabayadores de la mina Zarréu, fueron condergos a 2 años y mediu de prisión caún.

Demientres n’Asturies desmantelen la minería y los demás seutores industriales, demientres se conderga a la clas trabayadora al paru y la miseria, demientres la impunidá protexe a quien roben a mamplen los recursos que’l pueblu precisa pa sobrevivir, les cárceles vacíense de corruptos y enllénense con quien defenden y lluchen polos nuesos derechos más básicos.

Nun mundu llaboral precarizáu dafechu, onde la falta midíes de seguridá provoca muertes y pergraves accidentes, paez ser qu’incumplir toa norma de prevención y seguridá llaboral, despreciando la vida de los y les trabayadores, nun tien castigu dengún.

Sicasí, socorrer a los trabayadores accidentaos y ponelos en manes de los servicios médicos, castígase cola cárcel.

Quieren zarrar na cárcel a quien socorrieron a los trabayadores accidentaos ya indemnizar a quien punxeron en pelligru la vida de dichos trabayadores.

Nun podemos consentir esta inxusticia. Mañana podría pasanos a cualesquier de nós.