Confírmase’l segundu despidu na voz d’Avilés-El Comerciu (dambos trabayadores despidíos son militantes de la CSI)

Cuando inda suenen los glayíos de la manifestación escontra’l despidu d’un trabayador de La Voz Avilés-El Comerciu, militante de la Corriente Sindical d’Izquierda, la empresa comunicó’l despidu d’otru trabayador, tamién militante de la CSI.

El pasáu avientu de 2014, La Voz d’Avilés-El Comerciu comunicaba a los y les trabayadores que la mala situación económica de la empresa, “obligába-yos” a efectuar retayos salariales y reaxustes na plantía.

Darréu anunciáronse movilizaciones y convocatoria de fuelga per parte los y les trabayadores, entamándose un procesu negociaciones nel SASEC (Serviciu Asturianu de Solución Estraxudicial de Conflictos).

Pero, cuando se taba estudiando, per dambes partes, la posibilidá de llegar a una solución apautada, la empresa comunica’l despidu d’un trabayador, Alberto, militante de la CSI y miembru de la so Sección Sindical en La Voz d’Avilés-El Comerciu.

Darréu, convócase una movilización de refuga al despidu, que tuvo llugar güei mesmu, xueves 29 de xineru. Con éses, unos minutos dempués de rematar esta manifestación, recibimos la comunicación d’un nuevu despidu, el de Jesús, tamién militante de la CSI y tamién miembru de la so Sección Sindical en La Voz d’Avilés-El Comerciu.

Qué casualidá que dambos trabayadores despidíos pertenezan a la Corriente Sindical d’Izquierda.

Qué casualidá que dambos trabayadores fueren parte de la delegación qu’axustaba cola empresa.

Qué casualidá que dambos trabayadores opunxérense, en tou momentu, a aceptar denguna triba despidu o retayu salarial en La Voz d’Avilés-El Comerciu.

Qué casualidá qu’ún de los trabayadores despidíos presentárase a les eleiciones sindicales cellebraes apocayá en La Voz d’Avilés-El Comerciu.

Demasiaes casualidaes. Dende la CSI anunciamos el nuesu sofitu ensin fisures a los nuesos compañeros despidíos, l’entamu de les movilizaciones y les aiciones xudiciales necesaries pa frenar estos despidos y la defensa de los puestos de trabayu, con tolos medios al nuesu algame.

¡EN LA VOZ D’AVILÉS-EL COMERCIU: NIN DESPIDOS NIN RETAYOS!.