A un pasu de la victoria nel Hotel León

L’Asamblea Trabayadores del Hotel León atópase a un pasu d’algamar una perimportante victoria non yá pa ellos y elles, sinón pa tola clas obrera asturiana.

Dempués d’un añu d’enzarru nes instalaciones del hotel, dempués de cientos de movilizaciones, dempués d’una llucha exemplar contra toa triba torgues y zancadielles, los y les trabayadores del Hotel León tán a un pasu de consiguir la so recolocación nel Institutu Xerontolóxicu Astur, que va facese cargu de les instalaciones del hotel.

A falta de que los servicios xurídicos de dambes partes, afiguren por escritu los alcuerdos de recolocación y caltenimientu de los derechos llaborales, ye l’intre de dar l’impulsu definitivu por que la llucha d’estes compañeres y compañeros tenga’l final qu’ellos y elles, ensin dala dulda merécen.

Dende la CSI sentímonos parte d’esti enorme avance, felicitamos a estos compañeros y compañeres y a les Asamblees de Trabayadores en Llucha en Asturies pol enorme esfuerzu realizáu demientres esti añu d’enzarru y movilización y queremos tresmitir a tola clas obrera asturiana’l mensaxe de que la llucha obrero y solidario ye’l camín p’algamar un futuru meyor del qu’esti criminal sistema capitalista tiennos preparáu.

¡PUXA LA LLUCHA OBRERA!

¡PUXA L’ASAMBLEA TRABAYADORES DEL HOTEL LEÓN!