Xuicíu y concentración escontra’l despidu de la compañera de la Obra Cultural de Caxastur

Como informamos nel so momentu, el pasáu 25 xunetu de 2014 foi despidida la trabayadora de la Obra Cultural de Caxastur (con 23 años d’antigüedá) que la so demanda consiguió l’anulación del ERE promovíu en dicha Obra Cultural per parte la direición y que se negara a vender el so puestu trabayu, refugando la ufierta que se-y efectuó en tal sentíu.

El despidu de la compañera pretende xustificase altricando causes oxetives en base a la situación económica de la entidá y a que la Fundación Bancaria Caxastur, que sustitúi a la Obra Social y Cultural de la Caxa, nun desenvolvería actividaes culturales.

Argumentos falsos dafechui que namás pretenden, en vanu, tapecer los verdaderos motivos de represalia a la trabayadora, despía pola defensa los sos derechos y por habese negáu a vender el so puestu trabayu.

El xuiciu pol despidu fuera afitáu pal día 11 payares de 2014, pero retrasóse a pidimientu l’abogáu de la empresa pa, en teoría, encetar un procesu negociador qu’evitara dichu xuiciu y dexara un alcuerdu satisfactoriu.

A escases hores del xuiciu, nun s’efectuó denguna propuesta concreta y razonable a la trabayadora, polo que se constata que lo único que se pretendía con esti retrasu yera escenificar una supuesta voluntá negociadora absolutamente inesistente per parte’l Patronatu de la Fundación Bancaria Caxastur (órganu cimeru de direición de dicha Fundación, qu’asocede a la Obra Social y Cultural de Caxastur).

Pa sofitar a esta compañera y reivindicar el so derechu al puestu trabayu, vamos concentranos delantre los xulgaos de lo Social d’Uviéu na fecha’l xuiciu pol so despidu, el próximu martes, 13 xineru, a les 10,30.