Llamamientu de la CSI a la participación masiva nos actos pola absolución de los 5 mineros imputaos por socorrer a 3 compañeros nun accidente en “Mina de Cerredo” (Asturies)

SÁBADU 10 DE XINERU DE 2015. 18:00 h. ESTACIÓN D’AUTOBUSES DE CANGAS DEL NARCEA. ASTURIES (VAMOS PONER AUTOBUSES).

XUICIU: LLUNES 12 XINERU DE 2015. 10:30 h. XULGAOS DE LO PENAL. UVIÉU. ASTURIES.

El pasáu 12 xunetu de 2012 tuvo llugar un accidente llaboral na Mina de Zarréu, nel que se vieron afectaos trés trabayadores.

L’actuación neglixente ya irresponsable d’ún de los capataces de la empresa, nel orixe l’accidente y la so actuación posterior, al marxe los servicios mélicos, punxo en peligru la vida d’estos trés trabayadores.

Cientos de persones, compañeros de trabayu y vecinos y vecines, allegaron al llugar de los fechos, interesándose pol estáu de salú de los trabayadores accidentaos y denunciando la forma de proceder del capataz ente’l grave accidente que se produxere.

Los compañeros de trabayu y los vecinos y vecines de l’arrodiada qu’allegaron al llugar del accidente, torgaron que’l capataz siguiere cola so irresponsable actitú, poniendo a salvo a los trés trabayadores afeutaos y dexándolos nes manes de los servicios d’ambulancia.

Sicasí, agora atopamonos con que cinco persones vense acusaes, inxustamente, de presuntos delitos de mancadures, amenaces y daños, con un pidimientu de 6 años y mediu de prisión y multes superiores a los 15.000 €, pa caú de los acusaos.

Quieren zarrar na cárcel a quien socorrieron a los trabayadores accidentaos ya indemnizar a quien punxeron en pelligru la vida de dichos trabayadores.

Nun podemos consentir esta inxusticia. Mañana podría pasanos a cualesquier de nós.

¡NIN UNA PERSONA SOLA ÉNTE LA REPRESIÓN!
¡XUSTICIA SOCIAL!