¡Asturies en pie! llama a participar na concentración contra la Lei mordaza

¡Asturies de pie! fai un llamamientu a participar na concentración, convocada por No Somos Delito, contra la llamada Llei Mordaza, que va entrar dientro poco a valir, con un retayu de llibertaes que encamina a un verdaderu estáu dictatorial.

Ante un sistema capitalista en descomposición, pero coleando con muncha durez, la clase dominante decide castigar a la clase trabayadora con una serie d’iniciatives lexislatives, penalizando toa clase de llucha y resistencia contra’l sistema.

Y, efectivamente, el PP y los sos allegaos, como capataces del capital, tán dispuestos a llevar a cabu l’endurecimientu de penes y sanciones pa toles acciones de llucha, defensa y resistencia popular.

Empezaron cola denominada Llei de Tases Xudiciales, qu’esanicia’l principiu d’igualdá y torga l’accesu a la Xusticia a les persones que nun disponen de recursos económicos

Siguió con una pretendida reforma del códigu penal, y en dellos casos yá real, incluyendo tipos delictivos que podríen encuadrase nel denomináu, CODIGO PENAL DEL ENEMIGU, ye dicir nun se busca castigar lo que se fai, sinón lo que los denominaos, por ellos, antisistemas, podríen faer pa lluchar y aguantar les sos acometíes. Asina apaeceríen nuevos tipos delictivos ocupación de bancos, resistencia a los desahucios, sentaes o l’ampliación del delitu de resistencia a l’autoridá. Pero ta claro, coles mesmes ellos protéxense, entá mas, ensin agravar les penes de corrupción y impidiendo inclusive’l so ingresu en prisión si repararen el dañu, esto ye devolviendo lo robao.

Y, como últimu pasu, ta en procesu d’aprobación la Llei de Seguridá Ciudadana que, a última hora, fai sumir, na práctica, tolos derechos y llibertaes públiques.

Nesti contestu de represión, ya inda ensin qu’entraren a valir lleis muncho más represives, yá atopamos con munches compañeres y compañeros castigaos como autores de faltes y delitos penales y con ensame de sanciones económiques.

Ye necesariu recordar que na actualidá, y nos procesos penales abiertos a dellos compañeros y compañeres, esisten pidimientos de cárcel importantes. Asina, a títulu d’exemplu, podemos señalar que dende ¡Asturies de pie! defendemos a compañeres y compañeros que, poles movilizaciones de la minería, de la fuelga xeneral del 14-N y d’otres movilizaciones llaboral y social, atropen pidimientos fiscales que, en xunto, pueden superar los 50 años de prisión, quedando entá munches otres persones pendientes de la calificación por parte del Fiscal, pero a quien se-yos van pidir entá más años de perda de llibertá.

Nel conxuntu d’Asturies, tamos falando de decenes y decenes de persones imputaes y encausaes, que podríen xuntar un pidimientu fiscal de más de 300 años de prisión.

Toa esta lexislación y actuación represiva nun demuestra más que la llerza que-y tienen a la nuesa llucha por destruyir esti sistema infame, inhumanu, cruel y criminal, onde intenten que’l dineru y el poder se impóngan sobre la nuesa dignidá, los nuesos derechos y la xusticia social pola que tamos lluchando.

Dientro de la so estratexa represiva y apavoriante, y a puertes d’estrenar la so querida Llei Mordaza, orquesten montaxes mediáticu-políticu-policiales como la Operación Pandora, qu’esta selmana yera dirixida contra’l movimientu llibertariu. Despues d’asaltar delles viviendes, cases ocupaes y centros sociales, dempués de retener a persones mientres mas de 8 hores nos rexistros, dempués de detener a 11 persones… son siete les encarcelaes. El so únicu delitu ye’l mesmu qu’el de toes nós, el de pertenecer a la parte protestona de la sociedá, los argumentos pa tenelos en prisión pueden ser los que-yos vengan en gana, los de siempre, y agora cola llei mordaza con muncha más facilidá. La solidaridá para con estes compañeres tien que ser bultable nel día a día, mañana podemos ser cualesquier de nós, mañana puedes ser tu.

Toos y toes sabemos quién son y onde tán los verdaderos delincuentes que nos llevaron a la ruina y a la miseria. Pero ellos gocien d’impunidá. Esti sistema capitalista acuta les cárceles pa quien se remonta y protesta contra les inxusticies. Asina de criminales son les sos lleis y asina de criminales son quien lo dirixen y lo faen posible.

Pero nun podemos dexanos amedranar. Nun tenemos de tener mieu. Somos más y tenemos razón. Na resistencia y na llucha ta’l camín. Nel principiu de solidaridá ta la nuesa fuerza. Si toquen a unu o a una, tóquennos a toos y a toes.

¡FUERA LA LLEI MORDAZA!

¡XUSTICIA SOCIAL!