Asamblea añal de la CSI: otru pasu alantre pal nuesu sindicatu

Con una participación superior a la d’otros años, l’Asamblea añal de la Corriente Sindical d’Izquierda, supunxo un pasu alantre na marcha del sindicatu y un encontiu na so llínea sindical de defensa direuta de los derechos de la clas obrera.

La forma d’entamar la CSI pa encariar un futuru que, previsiblemente, va traer unes condiciones munchu más dures que les d’anguañu, la recuperanza de derechos fundamentales que, adulces, vamos perdiendo (llibre sindicación, negociación coleutiva, trabayu indefiníu, llibertá de fuelga, etc.), la forma de frenar los trataos internacionales de comerciu (TTIP), la organización, dientro y fora la CSI, de los y les trabayadores en paru o situación llaboral precaria, la construición de redes alternatives de produición y consumu cooperativu, el reforzamientu de la solidaridá internacionalista y la llucha ensin cuartel escontra la represión, fueron les temes que s’aldericaron y a los que, con un importante altor de discutiniu, intentó dáse-yos rempuesta.

Bien especialmente, quedó nidia la nuesa decisión, firme ya irrevocable, de nun dexar a denguna persona indefensa énte la represión policial, xudicial o empresarial, el reforzamientu de les lluches obreres na solidaridá de les Asamblees de Trabayadores en Llucha en Asturies y el sofitu ensin fendeúres de la CSI a la llucha de les persones en paru o na precariedá llaboral.

Tamién quedó constáu’l xorrecimientu la CSI n’afiliación y seiciones sindicales, col que’l sindicatu va encarar l’añu d’eleiciones sindicales que s’avera.

Queremos faer una mención especial al compañeru Orviz que, dempués de dos décades desendolcando de forma impecable la, por naide deseyada, llabor de finances, dio’l relevu con un impresionante discursu en defensa de los sos ideales comunistes y de la xunión y la movilización obrera como armes fundamentales pa superar el capitalismu que nos prime. Énte la corrupción y el robu xeneralizáu, la dedicación y la honradez, a preba bomba, del nuesu compañeru Orviz demientres décades, ye y va ser un exemplu, non sólo pa la CSI, sinon pal conxuntu la clas obrera asturiana. Afortunadamente, vamos siguir cuntando cola so participación n’otres xeres del sindicatu.

La CSI sal reforciada d’esta Asamblea, muncho más cohesionada y dimpuesta a anovar el so compromisu cola clas obrera asturiana na so llucha pa echar fuera lo que nos sobra: el capitalismu, los sos gobiernos, la so banca y la so patronal.

A les 18:00 h., finaba l’Asamblea añal de la CSI, solidarizándonos y allegando en sofitu a los y les trabayadores en fuelga en Burguer King, que se concentraben énte ún de los centros de trabayu.