¡FORA LOS FASCISTES DE LOS BARRIOS OBREROS!

¡QUEREMOS CONVIVIR EN PAZ!

El pasáu 25 d’ochobre, la organización d’estrema derecha Movimientu Social Republicanu (MSR) cellebró una xunta nun chigre de Los Barreros-Barredos, cola pretensión d’abrir ellí’l so primer “centru social” n’Asturies. Anque pel momento paez qu’esi proyeutu atayóse, naquella ocasión dieronse cita ellí numberosos ultraderechistes d’estremaes llocalidaes asturianes.

Ha tenese en cuenta qu’esti grupu caracterízase polos sos planteamientos violentos, racistes y xenófobos. D’un tempu p’acá, les organizaciones nazis y fascistes esistentes nel Estáu español, pa enfusar meyor na sociedá traten de ponese una piel de corderu. Esto ye lo qu’intenten faer dende’l Movimientu Social Republicanu, que conociendo les faltes d’una gran parte de la sociedá, pretenden esconder el so mensaxe detrás de repartíes de comida y ropa, alegando la falta d’ayuda a los “españoles” frente a los inmigrantes”, esi ye’l so mensaxe fácil y el discursu que meyor-y vien al sistema capitalista pa tratar d’estremanos y debilitanos.

Detrás de tola so demagoxa, esti discursu de la estrema derecha namá beneficia a los sectores privilexaos de la sociedá y a los sos representantes nos gobiernos de vez que, mientres siguen retayando los salarios, apatayando los derechos llaborales y desmantelando los servicios públicos, quieren despintar quien son realmente los responsables d’esta situación.

Porque nun podemos escaecer que la culpa nun la tien l’inmigrante, que-y paguen menos, la culpa tienla la patronal que nos esplota de forma distinta, nin de la xente que nun tien techu, sinón de los banqueros que nos echen a la cai. La culpa nun la tien la necesidá de la xente, la culpa ye del sistema que provoca y caltien la desigualdá.

Con esa piel de corderu y esa estratexa pretenden presentase a les elecciones municipales en Llaviana, con un discursu demagóxico y populista. Yá abrieron un faceboock que se llama “otru color pa Llaviana”, onde, cola sida de “recoyer” les quexes de los vecinos intenten dar a conocer la so cara más “atenta”. Pero nun podemos dexanos engañar. Según los medios, dellos de los deteníos polos fregaos que causaron la muerte del siguidor del Deportivu de La Coruña, Jimmy, nun taben xuníos por ser del Frente Altletico, sinón pola so pertenencia al MSR y l’afinidá ideolóxica con dichos ultres. Nel Tuit del MSR de Llaviana pudo lleese “…vinieron a Madrid buscando bronca y llévense un muertu de regalu, honor frente atléticu”.

EL FASCISMU NUN YE NENGUNA CHANCIA; CUARENTA AÑOS DE REPRESIÓN ENSEÑAR

N’Asturies conocemos bien la cara’l fascismu. Entá sigue en carne viva l’alcordanza de la represión y el comportamientu a la fin de la guerra civil de los falanxistes; que nun fueron otra cosa que chivatos y pistoleros. Los mesmos qu’ente munches otres atrocidaes, protagonizaron l’asesinatu de 22 persones en 1948 nel Pozu Funeres. Un crime ensin resolver y del que son herederos, ideológicamente falando, organizaciones como’l MSR.

El so filial xuvenil, la Lliga Xoven protagonizó decenes d’agresiones na universidá, arreventando actos políticos en defensa de la memoria hestórica, escontra los desahucios, etc. Ello ye que d’un tiempu acá, tamién se rexistraron agresiones de la estrema derecha escontra inmigrantes y xóvenes d’izquierda equí, nel Nalón.

Los nazis y fascistes integrantes n’organizaciones como’l MSR, LLIGA XOVEN, ASTURIES NON CONFORME, RECONQUISTA ÁSTUR, DEMOCRACIA NACIONAL, FALANXE… nun son bichos raros, tienen una vida normal como cualquier persona. Tienen les sos rellaciones nel trabayu, nos chigres, nos ximnasios, n’asociaciones y ye ende onde adulces van soltando’l so discursu.

Aisllalos, fae-yos el vacíu y que nun formen parte d’esa vida social, ye fundamental pa frenalos.

Por esti motivu, la inmensa mayoría de les organizaciones polítiques, sindicales y sociales con presencia nes cuenques mineres, faemos un llamamientu a la población y, bien especialmente, a los vecinos y vecines de Los Barreros-Barredos a aisllar dafechu a los fascistes y a quien na práctica tán contribuyendo a qu’esti velenu se desendolque.

Llamamos a nun collaborar en nenguna de les sos campañes que, cola escusa de “aidar” a families necesitaes, pretenden introducir l’odiu y la división ente nós, a nun aceptar la so propaganda xenófoba y, de xuru, a nun frecuentar los llocales de quien fomenten esta ideoloxía.

La llucha escontra la crisis ye una llucha política, una llucha que nos últimos años dimos de forma masiva na cai y que tenemos de llevar a les empreses, a los barrios, una llucha pa defender los nuesos derechos y el nuesu futuru, al pie de tolos sectores primíos y esplotaos de la sociedá, tengan la nacionalidá que tengan.

NATIVA O ESTRANXERA, LA MESMA CLASE OBRERA

¡FORA LOS FASCISTES DE LOS BARRIOS OBREROS!
Roblen:

Adepavan – Asturies de en Pie! – Asociación de Muyeres Afectaes de Endometriosis ADAEC (Asturies) – Atenéu Republicanu de Llangréu – CAVASTUR – CSA La Semiente – CSI – Coleutivu de Muyeres Les Filanderes – Darréu – El Militante – Estaya de La Memoria del Altu Nalón – Intervalu – izquierda Anticapitalista – IX – Muyeres del Carbón – Para@s y Precari@s d’ Asturies – PCE – PCPE – Podemos – PSOE – Sindicatu d’Estudiantes – Soldepaz Pachakuti – U.C. de CCOO del Nalón – U.C. d’UXT del Nalón – UJCE.