Absolución pa los 5 mineros de Mina de Zarréu_Charra informativa

Importantísima l’asistencia a tolos actos. HAI QUE DEFENDELOS.

ABSOLUCIÓN PA LOS CINCO MINEROS DE MINA DE ZARRÉU

Piden 32,5 años de cárcel pa cinco mineros d’Asturies y Llión, ún d’ellos militante de la CSI, por socorrer a trés compañeros nun accidente na Mina de Zarréu.

CHARRA INFORMATIVA. VIENRES 12 D’AVIENTU. 19:00 h. CASA DE CULTURA PALACIU D’OMAÑA (PLAZA LA OLIVA). CANGAS DEL NARCEA.

El pasáu 12 de xunetu de 2012 tuvo llugar un accidente llaboral na Mina de Zarréu, nel que se vieron afectaos trés trabayadores.

L’actuación neglixente ya irresponsable d’ún de los capataces de la empresa, nel orixe l’accidente y la so actuación posterior, al marxe los servicios mélicos, punxo en pelligru la vida d’estos trés trabayadores.

Cientos de persones, compañeros de trabayu y vecinos y vecines, allegaron al llugar de los fechos, interesándose pol estáu de salú de los trabayadores accidentaos y denunciando la forma proceder del capataz énte’l grave accidente que se produxera.

Los compañeros de trabayu y los vecinos y vecines de la fastera qu’allegaron al llugar del accidente, torgaron que’l capataz siguiera cola so irresponsable actitú, poniendo a salvo a los trés trabayadores afectaos y dexándolos en manos de los servicios d’ambulancia.

Sicasí, agora atopamonos con que cinco vecinos de la zona vense acusaos, inxustamente, de presuntos delitos de mancadures, amenaces y daños, con un pidimientu de 6 años y mediu de prisión y multes cimeres a los 15.000 €, pa caún de los acusaos.

Quieren pesllar na cárcel a quien socorrieron a los trabayadores accidentaos ya indemnizar a quien punxeron en pelligru la vida de dichos trabayadores.

Nun podemos consentir esta inxusticia. Mañana podríe pasanos a cualesquier de nós.

¡ESCONTRA LA REPRESIÓN DE LOS CACIQUES, LA SOLIDARIDÁ’L PUEBLU!