Llamamientu de la CSI a la manifestación escontra’l zarru d’Alcoa: convirtamos cada puestu de trabayu nuna trinchera

La Corriente Sindical d’Izquierda fai un llamamientu a la clas obrera asturiana, a participar na manifestación convocada polos y poles trabayadores d’Alcoa, que va salir de la plaza’l Vaticanu d’Avilés (Asturies), a les 19:00 h., el próximu xueves 11 d’avientu.

El control de la enerxía eléctrica, que los estremaos gobiernos cedieron a les compañíes eléctriques y la nueva orientación productiva d’Alcoa, con enormes inversiones n’otros países, como Arabia Saudina, tórnense nuna pinza que, como en tantes otres ocasiones, puede acabar dexando tiraos y tiraes na cai a cientos de trabayadores.

La riestra d’empreses pesllaes dende va unos años, ye interminable. Dellos datos ponen de relieve que, nos caberos cinco años, podríen haber zarráu más de 4.000 empreses n’Asturies, munches d’elles, dempués d’esbardiar importantes subvenciones públiques.

Asina, lleguemos a la situación d’anguañu: más de 100.000 persones en paru, más de 40.000 families asturianes con tolos sos miembros en paru; más de 200.000 persones perbaxu l’estragal de la probitú, ente un terciu y la metada los y les pensionistes cobren menos de 600 euros, el 60% de la mocedá ta ensin empléu y nin siquier los alimentos tán garantizaos pa toos y toes.

Asturies nun puede permitise nin un paráu nin una parada nin un pieslle d’empresa más. Pero, los y les trabayadores tamién sabemos que la nuesa meyor arma ye la nuesa propia capacidá d’organización y movilización.

Cola esperiencia algamada n’otros conflictos asemeyaos, como Tenneco, Caxastur, etc., dende la CSI queremos empobinar un mensaxe d’ánimu a tolos y toels trabayadores d’Alcoa, faciéndo-yos ver que ye posible echar la galga al ERE plantegáu pola empresa y consiguir la continuidá de l’actividá proiductiva y de la totalidá de los puestos de trabayu.

Por ello, dende la CSI afalamos a los y les trabayadores d’Alcoa a caltener la xunidá de la so Asamblea y defendela como únicu preséu válidu de decisión, movilización y negociación.

De la mesma manera, sofitamos la voluntá de la plantía d’Alcoa de caltenese na so posición de despidos-cero, ensin aceutar indemnizaciones en cuenta de puestos de trabayu y afitando como únicu oxetivu la continuidá de la planta y de la totalidá de los puestos de trabayu.

Nesta llucha, camentamos que’l papel de los sindicatos, entamando pola propia CSI, ye nidiu: respetar les decisiones de l’Asamblea de trabayadores d’Alcoa, y sofitar y reforciar, con tolos medios al nuesu algame, les xestiones, aiciones y movilizaciones por ella decidíes.

Nun se trata solamente de los puestos de trabayu d’anguañu, sinón tamién, de nun hipotecar el futuru de los nuesos fíos y fíes y de tresmiti-yos un heriedu que nun sían unes condiciones de vida miserables, impuestes pola Patronal y los sos gobiernos.

¡CADA PUESTU TRABAYU, UNA TRINCHERA!.

¡EN ALCOA NIN PIESLLE NIN DESPIDOS!

¡ALCOA NUN SE CIERRA!.