CSI-Plan INSERTA del Aytu. de Xixón, comunicáu a la opinión públicu

Dende la Sección Sindical de la CSI nel Plan Inserta 2013 queremos lo primero manifestar la nuesa satisfacción al conocer el resultáu de los 3 primeros xuicios de les múltiples demandes presentaes por extrabayadores y del citáu Plan pola su contratación en fraude de Llei. La selmana pasada dimos a conocer a los medios la primera de les sentencies emitíes, en concretu pola Sala de lo Social 1 de Xixón, y na que se reconocía’l fraude de Llei na contratación, obligando al Ayuntamientu de Xixón a realmitir al trabayador o a indemnizalu con 33 díes por añu por despíu improcedente. Esta mesma selmana, el martes, diéronse a conocer dos nueves sentencies, nesti casu de la Sala de lo Social 2 de Xixón, na que amás de reconocer la improcedencia del despíu reconocíase que los extrabayadores, al ser contrataos en fraude de Llei, deberíen tener recibío’l salariu del Conveniu del Personal Llaboral del Ayuntamiento y afita la indemnización de 33 díes por añu axustándose a esti criteriu. Creemos que esta última sentencia sienta un precedente que ha ser aplicáu pa los 35 xuicios que tovía queden por cellebrase.

Estes sentencies dexen claro que’l Conveniu del Plan Innova, aplicáu a los Planes Inserta y firmáu por Ayuntamientu, FADE, CCOO y UGT ye papel moyao, yá que cola falsa excusa de la formación y la inserción llaboral proporciona al Ayuntamientu mano d’obra barata pa cubrir les necesidaes habituales que a lo llargo de tol añu tién al su cargu.

Además de que nun se da dengún tipu de formación específica nel oficiu pol cual se contrató (un contrasentíu yá que na selección durante la prueba oposición valorábase experiencia, formación y titulación al respectu pa salir elexíu, y el Conveniu Innova recueye que los y les trabayadores recibirán 75 hores de formación específica, un seguimientu continuu de la su evolución y visites a empreses, aspectos toos ellos que nun se llevaron a cabu pela parte del contratador), l’Ayuntamientu utilizó de forma aleatoria a trabayadores d’un determináu oficiu pa facer llabores d’otru tipu, repetidamente y ensin denguna xustificación.

Por poner namás dalgunos exemplos, los y les trabayadores del plan Inserta destinaos n’Obres Públiques servíen pal mantenimientu habitual que esta sección del Ayuntamientu realiza, yá seya mantenimientu de Colexos, d’instalaciones municipales etc etc…Eso sí cola diferencia que al tar baxo un conveniu especial cobraben la mitá que los y les trabayadores de Personal d’Obres Públiques.

En Parques y Xardinos a los y les trabayadores del plan Inserta contrataos como xardineros poníaselos a trabayar como peones de la construcción de forma continua…

Durante tres meses trabayadores del Plan Inserta fueron destinaos al Patronatu Deportivu, pa realizar los trabayos que habría de realizar el personal de Lacera, empresa subcontratada pol Ayuntamiento que se encarga del mantenimientu y de la organización tamién del Concursu Hípicu.

N’otru orden de coses, queremos tamién denunciar les siguientes inregularidaes detectaes mientres los Planes Inserta 2013:

Dexáronse obres a medio facer como’l fraude de los güertos d’ociu de Mareo, onde gracies a una xestión nefasta, quedaron ensin facer pesie a que se anunció la su inaguración próximamente.

Nun se respetaron derechos llaborales como la llibre ellección de vacaciones o incumplimientos flagrantes de les normes de seguridá.

Hubo tratu caciquil de dalgunos capataces de parques y xardinos.

Cambiu de centru de trabayu y vestuariu sigún el caprichu de los capataces.

Utilizóse a ayudantes de servicios pa cubrir places de conserxes que deberíen cubrise con personal de plantilla nes escueles infantiles de La Camocha y Nuevu Roces.

Utilizóse tamién a ayudantes de servicios pa facer turnos de tarde en diferentes dependencies municipales, ensin plus económicu añadíu, dalgo de lo que sí disfruta’l personal propiu del Ayuntamientu.

Utilizóse a trabayadores del Plan Inserta pa realizar xestiones que deberíen tar llimitaes al personal de plantilla nos diferentes rexistros municipales, talos como emitir tarxetes ciudadanes y otres xestiones llimitaes como dicimos al personal de plantilla en cumplimientu de la Llei Orgánica de Protección de Datos.

Estes son namás una mínima parte de les inregularidaes detectaes. Asina, el fraude d’esti Plan ye manifiestu en tolos sentíos. Los y les trabayadores atópense en peores condiciones que’l Personal Llaboral Municipal y faciendo les mesmes funciones.

Paeznos además una vergoña que los sindicatos CCOO y UGT, que se faeen llamar de clase, consientan esti fraude y esta discriminación llaboral. Son perfectamente conocedores de la situación del personal contratáu nos Planes d’Empléu, autoeríxense en representantes de los mesmos ensin preguntá-yos a les los interesaos y nun mueven un déu por cambiar esta situación llaboral. Tá claro que namás-yos preocupen les sus cuotes de poder y les sus prebendes, y al nun tener derechu al votu los contrataos/es en Plan d’Empléu, a estos sindicatos nun-yos interesa lo más mínimo la su situación. Prediquen cuando-yos interesa que los Gobiernos del PP quieren acabar con too, pero son ellos mesmos los que se sumen al carru d’esi acabar con tolos derechos llaborales conquistaos.

D’otru lláu, queremos destacar que los y les trabayadores del Plan Inserta na su mayoría son xente con esperiencia y años trabayaos, que se acueyen a ésti dada la crisis y l’altu paru n’Asturies y Xixón, xente que pa entrar en munchos casos tuvo que acreditar esa esperiencia. Nun val el cuentu de la formación pa tener unos paries llaborales al marxen de la llexislación.

N’otru orden de coses, ye tamién sorprendente, por llamalo de dalguna manera, que l’Ayuntamientu diga que va siguir cometiendo este fraude pesie a les sentencies conocíes hasta agora. Querer facer recaer en quien defiende los sus derechos la responsabilidá de les posibles mermes nel númberu de contrataos en próximos Planes d’Empléu ye ruin y miserable. Si esto pasare únicamente sedría culpa de quien infrinxe la Llei y pisotea los derechos llaborales, y de quien despilfarra les perres públiques n’obres públiques ensin sentíu y otres actuaciones hilarantes. Afalamos a los representantes municipales y a los representantes sindicales de CCOO y UGT a que dean la cara y despliquen a los y les xixoneses por qué se salten a la torera la Llei pisoteando derechos llaborales y provocando probablemente unes indemnizaciones de decenes de miles d’euros que recaerán sobre les arques municipales.

Pa finalizar, queremos anunciar que’l próximu miércoles nos personaremos nel Centru Municipal d’El Coto pa informar a los aspirantes a un contratu nel nuevu Plan Inserta de los sus derechos y de que van ser contrataos en fraude de Llei, afalándolos asinamesmo a siguir los pasos que dieron 38 compañeros y compañeres esti añu y llevando hasta les últimes consecuencies llegales la denuncia d’esta situación.