Concentración de sofitu nel xuiciu pola sanción al delegáu sindical de la csi n’Arcelor

La direición d’Arcelor sancionó con 21 díes d’empléu y sueldu al delegáu sindical de la Corriente Sindical d’Izquierda nel Comité d’Empresa de Xixón.

El nuesu compañeru recurrió nel xulgáu de lo social esta sanción y el xuiciu cellebraráse’l próximu miércoles 3 d’avientu. Por ello, la CSI convocó, esi día, una concentración de sofitu al trabayador, de magar les 10:30 h., nos xulgaos de Xixón.

El delitu” del nuesu compañeru foi realmente grave: dar la cara pa defender los derechos llaborales de los y les trabayadores d’Arcelor. Denunciando los abusos empresariales, los retayos salariales, defendiendo’ l repartu’l trabayu, la fin de les hores extres, los descansos llaborales, les nueves contrataciones y, a lo cabero, prauticando un sindicalismu ensin claudicaciones, ensin corrupción y ensin traiciones.

Tanto’l nuesu compañeru represaliáu, como l’aición sindical del conxuntu la CSI n’Arcelor, son una torga pa la empresa y por eso intenten coartarnos y amedrananos, remanando esta sanción como un escarmientu.

Pero, llueñe d’ello, dende la CSI vamos sofitar al nuesu compañeru ensin fisuras y con tolos medios al nuesu algame. Y vamos defendenos de forma decidida, tantu nel tarrén sindical como nel xudicial.

¡LA REPRESIÓN SINDICAL NUN VA PARAR LA NUESA LLUCHA!.

¡PUXA LA LLUCHA DE LA CLASE OBRERA!