Declaráu improcedente’l despidu d’un trabayador del Plan Enserta 2013, del Conceyu de Xixón

Güei vienres conocióse la sentencia de la Sala 1 de lo Social de Xixón respecto a la demanda presentada por un trabayador del Plan Inserta 2013. Esta ye solo la primer sentencia emitía, con 3 xuicios cellebraos hasta’l momentu, del total de 38 demandes interpuestes por ex-trabayadores de les diferentes ediciones del Plan Inserta 2013, y que sedrán vistes nes 4 sales de lo social nos próximos meses.

Talu como yá ficiere público en repetíes ocasiones la Corriente Sindical d’Izquierda, esti grupu de trabayadores denuncien que fueron contrataos en fraude de llei, yá que nel su contratu constaba “Obra o Serviciu” cuando na práctica real taben desarrollando llabores y funciones propies del personal llaboral de plantilla del Ayuntamientu Xixón. Agora ye’l xuez quien reconoz esta contratación en fraude de llei.

La Corriente Sindical d’Izquierda quier denunciar de nueu públicamente al Ayuntamientu y a CCOO y UGT, autoelexíos estos últimos como representantes de los y les trabayadores del Plan Innova, por precarizar l’empléu públicu, yá que conocedores de les repetíes sentencies n’años precedentes en casos iguales o asemeyaos al que agora nos ocupa, y conocedores de que los Planes de Empleo son en realidá una maniobra pa contratar a personal en condiciones precaries pa exercer llabores propies de plantilla, nun ponen remediu a esta situación, y conocedores de les repetíes denuncies públiques de la CSI y de la gran cantidá de demandes interpuestes, siguen pel mesmu camín y vuelven a contratar a personal de los nuevos Planes Inserta cola mesma modalidá de contratu, lo que de xuru va acarretar una nueva foleada de demandes de les y los trabayadores coles sus sentencies favorables correspondientes, y el subsiguiente gastu públicu que orixinarán les indemnizaciones derivaes del despreciu d’Ayuntamientu, CCOO y UGT hacia los y les trabayadores.

Por último, dende la Corriente Sindical d’Izquierda queremos felicitar a les y los trabayadores que se atrevieron a plantar cara a la esplotación y la precariedá nos Planes d’Empléu presentando estes demandes, y ponémonos a disposición de cuantos trabayadores recién contrataos y próximes a contratar quieran facer valer los sus derechos y denunciar la su contratación en fraude de Llei.