Nun tragamos ante la esclusión y la precariedá

Antes y dempués de los xuicios de los compañeros que’l miércoles tienen que pasar polos xulgaos de Xixón:

Nun tragamos ante la esclusión y la precariedá.
Ayunos solidarios pa denunciar les polítiques sociales de miseria.
Día 19 de payares frente a la Fundación Municipal de Servicios sociales .
8:00 de la mañana.

Comunicáu de l’Asamblea d’información y denuncia de servicios sociales:

Esta mañana ,faíamos entrega de les primeres 550 firmes pa esixir el cambéu de la norma de les Ayudes d’Emerxencia. Nun foi posible faer entrega de manera directa a l’Alcaldesa de la ciudá, que nun s’atopaba nel edificiu . Dexóse-y al so secretariu. Na asamblea posterior alcordamos dar un pasu más nes nueses acciones pa esixir el derechu a vivir dignamente…….Por que nun tragamos ante la esclusión y la precariedá…

Mas de 200.000 persones per debaxo del estragal de la probeza, 95.000 persones nel desempléu,mas de 4.500 families esperando pol salariu social una media de 15 meses, nun son pa ells razónes abondos por que les alministraciones de Xixón y Asturies y los sos responsables pongan nel centru de les sos polítiques a les persones y el nuesu derechu a vivir dignamente.

Dende l’Asamblea d’información y denuncia sobre les polítiques sociales venimos denunciando les polítiques de misería (la xestión de les Ayudes d’emerxencia, l’atascu del salariu social, la inutilidá y insuficiencia de los planes enerxéticos pa mayores de 80 años o’l plan contra la probeza infantil) del Conceyu de Xixón y del Gobiernu d’Asturies, que nun reconocen el derechu a vivir dignamente de les persones y que nos conderguen al llaberintu de la probeza y l’esclusión social.

Ante esta situación d’emerxencia social que nun puede esperar queremos declarar que NUN TRAGAMOS MAS y qu’empecipiamos una campaña d’ayunos solidarios pa denunciar la situaciones de probeza y precariedá que se viven en Asturies y en Xixón y esixir respuestes inmediates.

Colos Ayunos vamos denunciar les distintes situaciones d’esclusión social que viven persones concretes nel día ente día. Empezamos el día 19 de Noviembre cola situación d’un vecín de Xixón que lleva mas de 13 meses esperando pol salariu social y torgar aportar a les Ayudes d’Emerxencia municipales. Nestos meses de precariedá, lo único qu’atopó son continues torgues nun llaberintu burocratico que solo busca qu’arrenuncie na so intención d’exercer el so derechu a les ayudes sociales.

Convidamos a toles persones y grupos que quieran denunciar la situacion d’esclusión y precariedá que se vive en asturies en tolos ambitos (sanidá, educación, solidaridá..etc) que se xunan a los Ayunos solidarios qu’empecipiamos el día 19 de payares.