La CSI denuncia al conceyu d’Avilés y a la mutua Ibermutuamur por irregularidaes nos problemes de salú llaboral nes piscines municipales

LA CSI DENUNCIA AL CONCEYU D’AVILÉS Y LA MUTUA IBERMUTUAMUR POR IRREGULARIDAES NOS PROBLEMES DE SALÚ LLABORAL NES PISCINES MUNICIPALES.

La Corriente Sindical d’Izquierda denunció al Conceyu d’Avilés y a la mutua Ibermutuamur énte la Inspeición de Trabayu y la Inspeición Mélica, poles sos práutiques irregulares, a la d’iguar los problemes de salú llaboral de los y les trabayadores de diches instalaciones.

El pasáu martes 28 d’ochobre, un trabayador de les piscines municipales allegó a la mutua, afectáu, como n’otres ocasiones, por una mancadura ocular prevocada poles nocives condiciones ambientales que se dan en diches piscines municipales.

El Serviciu Prevención del Conceyu personóse na piscina municipal, pero en dengún intre s’empobinó al trabayador y nin siquier s’interesó por comprebar el so estáu de salú.

L’informe del oftalmólogu designáu pola mutua foi bien nidiu, encamentando la baxa llaboral del trabayador y calteniéndola hasta’l vienres 30 d’ochobre, día en que se produciríe una nueva revisión médica.

Sicasí, el miércoles 29 d’ochobre, el trabayador recibió una llamada del mélicu la mutua, na que-y informa de que, por indicaciones de los sos superiores, tien de ñega-y la baxa mélica y allegar al so puestu trabayu.

Énte’l requerimientu por escritu d’estos cambeos, Ibermutuamur ñégase aduciendo que nun se producieron cambeos, porque nunca s’emitió un parte baxa y porque, amás, la empresa, esto ye, el Conceyu, tampoco unvió’l parte d’accidente, como sería’l so deber.

Darréu, el trabayador allegó al médicu de la Seguridá Social que, dempués de la reconocencia médico y previo consulta a la Inspeición Mélica, pasó al trabayador a la situación d’Incapacidá Llaboral Transitoria (baxa llaboral).

Dende la Corriente Sindical d’Izquierda, comprebamos que, tantu’l Conceyu y el so Serviciu de Prevención, como la mutua d’accidentes, siguen coles sos práutiques irregulares, ñegando los problemes de salú de los y les trabayadores de les piscines municipales, tal que fixeron nel pergrave accidente asocedíu en 2007, que la so responsabilidá recayó finalmente sobre’l Conceyu, por sentencia del Tribunal Superior de Xusticia d’Asturies.

La práutica totalidá de los y les trabayadores de les piscines municipales, tresmitieron les sos quexes por escritu a la Fundación Municipal de Deportes del Conceyu, poles males condiciones de salú llaboral esistentes nes piscines. Sicasí, los responsables municipales siguen faciendo oyíos sordos y el Serviciu Prevención sigue argumentando que les condiciones ambientales permanecen nes llendes llegales. Pero la salú de los y les trabayadores sigue resintiéndose y empiorando.

Yá en 2007, el Conceyu contrató a una empresa privada pa ellaborar l’informe que ñegó la esistencia del accidente que dexó mancaos pa tola vida a un monitor y una monitora de les piscines municipales avilesines. Curiosamente, quien roblaron esi informe, que foi desautorizáu pol Tribunal Superior de Xusticia, agora trabayen pal Conceyu d’Avilés, precisamente nel Serviciu Prevención; ¿casualidá?.

Pero, si grave ye l’actitú de la mutua Ibermutuamur, más grave ye, entá, la práutica de los responsables municipales de les piscines, que siguen cola so actitú de ñegar la esistencia de los accidentes llaborales y del deterioru progresivu de la salú de los y les trabayadores, llegando, inclusive, a cometer graves irregularidaes como nun unviar los partes d’accidente a la mutua.

Por too ello, la CSI denunció estos fechos ante la Inspeición de Trabayu y la Inspeición Mélica y va entamar los trámites de Cambéu de Continxencies, por que se reconoza l’orixe llaboral de les mancadures oculares del trabayador municipal y sían los responsables municipales y la mutua Ibermutuamur, y non la Seguridá Social, quien cargue coles responsabilidaes económiques y de cualesquier otra índole, que pudieren derivase d’esti casu.