La CSI llama a la clase obrera asturiana a participar na manifestación escontra la represión y pola absolución de les persones encausaes na Güelga xeneral del 14 N del 2012

¡Nun mos van quitar el drechu a güelga!

La Corriente Sindical d’Izquierda quier desixir públicamente l’absolución de toles persones encausaes por participar na fuelga xeneral del 14-P y llama a la clas obrera asturiana a participar na manifestación que va tener llugar en Xixón el próximu vienres, 14 payares.

Na fuelga xeneral del 14 payares de 2012, cientos de persones fueron deteníes y encausaes con pidimientos de cárcel desproporcionaos. N’Asturies, seis d’eses persones enfréntense a un pidimientu que, en conxunto, supera los 12 años de prisión.

Aquel 14 payares, un piquete informativu de los sindicatos CSI y CXT foi afrelláu na cai Llangréu de Xixón, por una carga policial totalmente inxustificada. Esta carga siguió hasta la Casa Sindical, onde entraron les unidaes policiales de la UIP, invadiendo, de forma absolutamente illegal, les sedes de los sindicatos y dexando a delles persones mancaes, que tuvieron que ser atendíes por unidaes móviles del SAMU.

La detención de 4 persones provocó que miles de trabayadores arrodiaren la comisaría Xixón demientres delles hores, hasta la so puesta en llibertá.

De resultes de too ello, agora seis persones enfréntense a xuicios con pidimientos fiscales que, en conxunto, superen los 12 años de prisión.

Sicasí, nin una sola de les denuncies interpuestes poles persones afrellaes pola policía, foi siquier almitida a trámite, a pesar de que los partes médicos destacaben la gravedá de les mancadures que, en dalgún casu, precisaron d’intervención quirúrxica.

Non hai dulda de la desesperada situación pola que tán pasando millones de persones n’Asturies y nel Estáu español. Despidos, zarros d’empreses, paru, perda viviendes, families arruinaes, probitú…, tán xenerando una riestra protestes obreres y sociales cada vegada más intenses.

La rabia popular xorrez cuando se compreba la escesiva riqueza na que vive una minoría privilexada y la patente impunidá qu’arrodia a una corrupción político y económico cada vuelta más xeneralizada.

La esplosiva situación social que ta dreándose, ta siendo contestada dende’l Gobiernu con una esguilada desproporcionada de la represión, na que les detenciones y encarcelamientos arbitrarios y la proliferación d’esaxeraes sanciones económiques ensin sen dengún, desanicien na práutica tolos derechos y llibertaes públiques. Y, pa ello, desendolcaron una riestra reformes llegales.

Entamaron cola denominada Llei de Tases Xudiciales, torgando, al traviés de la cortapisa económica, que los y les trabayadores podamos reclamar y defender lo que pescanciamos xusto, torgándonos aportar a la xusticia en condiciones d’igualdá.

Siguieron con una reforma’l códigu penal empuesta puramente a escorrer cualisquier triba protesta social. Asina apaecen nuevos tipos delictivos, ocupación de bancos, resistencia a los desahucios, sentaes o l’ampliación del delitu de resistencia a l’autoridá. Pero naturalmente, ellos protéxense inda más, ensin agravar penes de corrupción y torgando, inclusive, el so ingresu en prisión si reparar el dañu, esto ye, ensin devolver lo robao.

Y, como caberu pasu, ta en procesu d’aprobación la Llei de Seguridá Ciudadana que, na so actual redaición, taraza garantíes procesales de prueba y defensa al conceder validez puramente a la declaración policial, tipifica como delitos la mera participación n’aiciones de protesta, prohibe la grabación de les actuaciones policiales, qu’eviten abusos n’ensame d’ocasiones, o alza desproporcionadamente toles sanciones. A lo cabero, la llamada llei mordaza desanicia, na práutica, tolos derechos y llibertaes públiques.

Toos y toes sabemos quién son y aú tán los verdaderos delincuentes que nos llevaron a la ruina y a la miseria. Pero ellos gocien d’impunidá. Esti sistema capitalista acuta les cárceles pa quien se remonta y protesta escontra les inxusticies. Asina de criminales son les sos lleis y asina de criminales son quien lo dirixen y lu faen posible.

¡NIN UNA PERSONA SOLA ANTE LA REPRESIÓN!
¡XUSTICIA SOCIAL!.