La CSI desixe a la fiscalía superior d’Asturies, aiciones escontra la corrupción

La Corriente Sindical d’Izquierda (CSI) desixe que la Fiscal Superior d’Asturies pase de les palabres a los fechos y cumpla cola so obligación d’escorrer los delitos de pescuezu blancu, ente ellos la privatización fraudulenta de Caxastur, y que s’acabe la impunidá pa los delincuentes con poder políticu y económicu.

Énte les declaraciones efectuaes pola Fiscal Cimera d’Asturies, nel sen de que se “llevantó la llebre” al respeutive de la persecución de los delitos de corrupción, la Corriente Sindical d’Izquierda de Caxastur desixe que la Fiscalía asturiana cumpla col so deber y abandone la política de mirar pa otru llau que llevó hasta agora cuando los presuntos delincuentes son personaxes con poder políticu y económicu.

En contraste cola durez qu’amosó a la de pidir penes de cárcel pa decenes de trabayadores asturianos y asturianes con acusaciones de participar en movilizaciones en defensa de los puestos de trabayu, la Fiscalía ignoró hasta agora toles trames de corrupción qu’operen n’Asturies, que la so esistencia ye pública y vultable y que’l so funcionamientu ye de sobra conocíu pola ciudadanía.

La Fiscalía asturiana, incumpliendo coles sos obligaciones, non solamente nun escorrió d’oficiu los delitos de pescuezu blancu, sinón que, a la escontra, lleva tiempu actuando como abogáu defensor de quien tienen un ciertu estatus social, políticu y económicu.

Nel casu la privatización de Caxastur, una estafa de mayúscules dimensiones, la Fiscalía asturiana nun impulsó denguna triba d’investigación alrodiu les decisiones garraes polos Conseyos d’Alministración de la entidá que, pa beneficiu d’unos pocos, acabó por ser lliquidada ensin que dengún de los responsables tuviere de responder énte la Xusticia.

Pa mayor abundamiento, énte la denuncia presentada pola CSI escontra los direutivos de Caxastur sobre la operación de La Talá, una trama d’especulación urbanística amestada a la corrupción política, que supunxo unes perdes de más de 30 millones d’euros pa Caxastur, la Fiscalía, magar d’un contundente informe de la Unidá de Delitos Económicos de la Policía, afirma que nun ve nicios de delitu y encamienta el so archivu y sobreseimientu.

La CSI desixe a la Fiscal Xeneral d’Asturies que demuese con fechos les sos declaraciones alrodiu la so voluntá d’escorrer la lacra de la corrupción y que dexe d’aplicar un doble raseru en función del nivel políticu, social y económicu de los presuntos delincuentes.