Concentración en sofitu a la despidida por lluchar del Gerhotel Los Carbayos n’Uviéu

Distintos conflictos, distintes lluches, un mesmu sindicatu.

Como siempres qu’hai un despidu por lluchar y esixir los derechos de toos y toes, llamamos a la solidaridá. Que nengún compañeru o compañera quede solo/a contra la represión llaboral, nin na empresa, nin na cai, nin nos xulgaos. La llucha ye l’únicu camín y la solidaridá la pilastra más importante.

Gerhotel Los Robles:

En 2012 inaugúrase’l Gerhotel los Carbayos Uviéu que pertenez al grupu previsión sanitaria nacional PSN. Una mutua pa profesionales del sector sanitariu y otros colectivos de profesionales universitarios del que Carmen Rodríguez, presidenta del colexu de médicos d’Asturies entós daquella, ye vicepresidenta.

En tan importante eventu l’alcalde d’Uviéu Iglesias Caunedo estima al grupu’l so compromisu cola ciudá al escoyela p’allugar un centru “sinónimu de modernidá, que va xenerar empléu y nel corazón mesmu del cascu antiguu” cerrando l’actu con una cita emprestada de Carmen Rodríguez “Llarga vida a los mayores”. Como colofón, un cura bendiz el centru.

Pero na trastienda de tanta prosperidá y exclusividá escuéndese otra realidá pa les trabayadores con contratos d’obra en fraude y ensin cobrar hores extres, festivos nin nocturnidá. Les auxiliares de xeriatría lleven plaques identificatives como auxiliares d’enfermería pero son contrataes como camareres de pisos colo que estes trabayadores tienen qu’alternar los cuidaos cola llimpieza de les habitaciones, aforrando en personal de llimpieza del que prescinden a principios de 2013.

Una de les recepcionistes farta de la situación, n’afayando que-y empiecen a quitar dineru de la nómina por un supuestu erru na categoría, decide denunciar y reconócense-y xudicialmente les sos reclamaciones. Entá asina la empresa nun cumple los alcuerdos lo que lleva a una nueva reclamación. Poco dempués ensin previu avisu, mientres ta nel so puestu de trabayu, comunícase-y que “la obra pa la que foi contratada (que ye la mesma que la de les sos compañeres) remató” y ponen a otra trabayadora nel so puestu darréu.

Carmen Rodríguez, que mientres yera presidenta del colexu de médicos d’Asturies oponse a la Llei Orgánica de Salú Sexual y Reproductiva y de la Interrupción Voluntaria del Embaranzu porque, nes sos palabres, “llóxicamente los médicos formense pa salvar vides non pa quitales”, ye un exemplu d’esos autoproclamados “provida” que hipócritamente falen de protección de la vida mientres esploten a les trabayadores y faen imposible la conciliación de la vida llaboral y personal castigando, amás, a les trabayadores qu’esixen los sos derechos.

El Miércoles 29 d’Ochobre nel xulgáu de lo social númberu 3 d’Uviéu a les 10:30, concentración en solidaridá con esta trabayadora nel xuiciu por despidu por reclamar los sos drechos.

¡NIN DESPIDOS, NIN PIESLLES!
¡BASTA DE FALSES LLECCIONES DE MORALIDÁ QUERIENDO ROBANOS EL NUESU DERECHU A DECIDIR MIENTRES FAEN MÁS MISERABLES NUESES VIDES!
¡SI TÓQUENNOS A UNA, TÓQUENNOS A TOES!

Muyeres en llucha de la CSI