Concentración de sofitu a un compañero en paru, acusáu por SOGEPSA de robar malla señalizadora nun polígonu industrial abandonáu de Bobes

¡ASTURIES EN PIE!

¡Asturies en Pie! convoca una concentración de sofitu a un militante de la CSI y miembru de Para@s y Precari@s d’Asturies, que foi acusáu pola empresa pública Sogepsa, de robar dellos metros de malla señalizadora nel polígonu de Bobes (Siero), que ta inacabáu y n’estáu d’abandonu.

Da la casualidá de que Sogepsa ye una empresa de capital mestu, con mayoría de capital públicu, creada pa la xestión del suelu, que s’atopa sol barruntu, más que fundáu, de ser un chiringu empobináu a avalar unes operaciones de suelu industrial qu’escarecíen de viabilidá, como’l polígonu de Bobes, que nunca cuntó col financiamientu abondu pa la so construición, pero sí foi avaláu con decenes de millones d’euros pol Gobiernu asturianu..

Amás d’ello, los vecinos y vecines espropiaes pa la construición del polígonu de Bobes, recibieron indemnizaciones perbaxu’l preciu mercáu y, amás d’ello, tuvieron qu’enfrentase al pagu del Impuestu sobre l’Incrementu’l Valor de los Tarrenos de Naturaleza Urbana, conocíu tamién como “la plusvalía”.

Énte too ello, a Sogepsa y al so mayor accionista, el Gobiernu asturianu, nun se-yos ocurre otra cosa que denunciar a un paráu ensin denguna triba ingresu, pol inesistente robu de dellos metros de malla señalizadora, nun polígonu abandonáu, so barruntu de corrupción y que’l so únicu usu ye’l de ser visitáu por un ensame de vecinos y vecines pa faer footing o pasiar a les sos mascotes.