CSI, Manifestación escontra’l paru, los despidos y los zarros d’empresa n’Asturies

CONVOCA: ASAMBLEES DE TRABAYADORES EN LLUCHA N’ASTURIES.

La Corriente Sindical d’Izquierda fai un llamamientu a la clas obrera asturiana, a la participación na manifestación escontra’l paru, los despidos y los pieslles d’empresa, convocada poles Asamblees de Trabayadores en Llucha n’Asturies, que va salir del Hotel León (avda. La Costa 45), en Xixón, el próximu miércoles 15 ochobre, a les 19:00 h.

Esta vegada, dende la CSI nun vamos dar más datos sobre paru, precariedá, families ensin dengún tipu d’ingresu, persones desahuciaes y tiraes na cai, beneficios de la Banca, abusos de la Patronal, deterioru de la Sanidá, la Educación o los Servicios Sociales, corrupción xeneralizada, etc.

A cencielles vamos dicir que la clas obrera asturiana ta abandonada a la so suerte y la probitú y la miseria ye l’únicu futuru que’l Gobiernu asturianu y los partíos parllamentarios, tiénennos planiáu. Baste dicir que nin siquier los alimentos tán garantizaos pa toes y toos. La fame, la miseria y la represión ya, inclusive, la cárcel, si daquién decide protestar.

Mentantu, la Banca bati records de beneficios, a la Patronal namás-y falta pidir la llegalización del esclavismu y les direiciones de los sindicatos del Réxime miren pa otru lláu cola mesma cara dura cola que reciben subvenciones.

Tenemos d’echar la galga a too esto y, dende la CSI, sofitamos ensin reserves les movilizaciones de les Asamblees de Trabayadores en Llucha n’Asturies, realizaes dende la autoorganización obrera, col únicu protagonismu de los y les trabayadores, percima les direiciones sindicales o polítiques y col únicu oxetivu de defender los derechos obreros y populares.

¡NIN UN PARÁU NIN UNA PARADA NIN UN DESPIDU NIN UN PIESLLE D’EMPRESA MÁS N’ASTURIES!. ¡LA LLUCHA YE L’ÚNICU CAMÍN!.