Manifestación ¡Non a los trataos de llibre comercíu!

¡¡DI NON A LOS TRATAOS DE COMERCIU LLIBRE!!
CON ELLOS VAN ESTRUYANOS TOVÍA MÁS A LA CLASE OBRERA.

La Unión Europea ta negociando en secreto -nin siquiera les diputaes nacionales y europees tienen accesu a los borradores, lo que sabemos vien de filtraciones- dellos trataos de comerciu llibre con EEUU (TTIP), Canadá (CETA) y otros paises (TISA y EPA). Esta actitú antidemocrática va na mesma llinia qu’el conteníu de los trataos, que supón, entre otres coses, más esplotación llaboral y menos servicios públicos pa la clase trabayadora y un pasu más na perda de soberanía de los estaos pertenecientes a la UE.
Un oxetivu perimportante d’estos trataos ye que les corporaciones, grandes empreses y grupos financieros s’apropien de lo que pa ellos ye un gran negociu: los servicios públicos. Imponen la so privatización y prohíben la nacionalización de cualquier serviciu públicu priváu.
Una vez firmaos los trataos pola Unión Europea, ningún país miembru va poder tomar ninguna midía contraria a ellos y va crease un órganu de gobiernu internacional pa obligar al so cumplimientu.
Los parlamentos y gobiernos de los estaos de la UE nun van poder tomar decisiones, como por exemplu l’ameyoramientu de les condiciones llaborales o la prohibición d’actividaes nocives pa la salú, que perxudiquen a grandes empreses, porque va crease un órganu d’arbitraxe (sistema de resolución de conflictos inversor-estáu) que puede obligar al estáu a indemnizar a estes empreses si considera que les lleis promulgaes yos afeutan negativamente.
Amás, los trataos imponen que les normes respeuto a la protección del Mediu Ambiente y la salú de EE.UU. y Canadá, más permisives cola destrucción y menos estrictes col principiu de precaución, seyan legales na Unión Europea, amenazando la nuesa salú y la de les xeneraciones venideres: la fracturación hidráulica pa estracción de hidrocarburos (fracking), los alimentos modificaos xenéticamente y la carne tratada con hormones, etc. van ser permitíes sin restricciones.
Tamién prohíbese cualquier midía proteicionista por parte los estaos, por exemplu en materia agroganadera. Les/os agricultores y ganaderes/os europees van vese mui perxudicaes al enfrentase col sistema agroganadero norteamericano, más competitivo porque ye mui intensivu y industrializáu, latifundista y abusivo de sustancies tóxiques. Pero esto nun va afeutar sólo a les campesines y campesinos, tamién al conxunto la población, que va inxerir alimentos más nocivos.
Otru puntu d’estos trataos ye la imposición de lleis de derechos d’autora y patentes que van restrinxir fuertemente l’accesu a la información, la educación, la investigación científica y la cultura, y qu’amás van usase pa lexitimar l’espionaxe a les internautes.

Si quiés informate más pués ver estos enllaces:


http://www.stop-ttip-ceta-tisa.eu/es/

Picu Rabicu