Comunicáu de CSI Avilés énte la información asoleyada nun mediu de comunicación asturianu

Énte la información asoleyada nun mediu de comunicación asturianu, alrodiu la participación de la Corriente Sindical d’Izquierda (CSI) d’Avilés na ellaboración y promoción d’una candidatura eleutoral participada por Podemos, IX, Equo y otros movimientos ciudadanos, la Corriente Sindical d’Izquierda d’Avilés quier faer públicu lo que vien darréu:

1-CSI-Avilés desmiente dafechu esta información. El nuesu sindicatu nin participa nin va participar en denguna candidatura eleutoral.

2-Na nuesa independencia de cualisquier partíu políticu o institución, básase la nuesa llibertá y capacidá pa defender los derechos de los y les trabayadores. Ésti ye’l nuesu oxetivu prioritariu y nunca vamos hipotecalo, amarrándonos les manos a denguna opción política.

3-Tantu ye asina, que na CSI nun tán permitíes persones lliberaes y nun s’aceuta nenguna triba subvención, venga ésta d’onde venga (partíos políticos, instituciones, conseyeríes ayuntamientos, ministerios, etc).

4-Respetando la llibertá de cada afiliáu o afiliada pa participar en candidatures eleutorales, dende la CSI siempres pidimos a la nuesa afiliación que defendan puramente aquelles alternatives polítiques respetuoses colos derechos de los y les trabayadores y que caltengan al conxuntu’l sindicatu al marxe les sos opciones eleutorales.

CSI Avilés