Declarados improcedentes los despidos na empresa Cébrano

El Xulgáu de lo Social nº 6 d’Uviéu declaró IMPROCEDENTE’l despidu del que fueron oxetu cinco trabayadores de l’Asociación Cébrano, condergando a la empresa a la realmisión o a la indemnización de los mesmos.

L’Asociación d’Afectaos por Dañu Cerebral Sobreveníu (Cébrano) tenía un Centru Sofitu a la Integración en Carbayín Altu (Siero), dende xunu de 2007. L’edificiu ye propiedá’l Conceyu y foi construyíu con fondos mineros. EL Conceyu Siero corría colos gastos de lluz, agua y caltenimientu l’edificiu, amás d’apurrir fondos municipales por valor de 20.000 euros añales. Los Conceyos d’Uviéu y Xixón tamién realizaben una aportación económica añal.

L’Asociación beneficiábase de subvenciones añales d’obres sociales de delles entidaes bancaries como Caxastur, Caxa Madrid y La Caixa y d’entidaes rellacionaes cola discapacidá (COCEMFE, FEDACE). Los dos microbuses afechos fueron donaos por Caxastur. El postreru, n’agostu de 2011, valoráu en 58.000 euros.

Había places privaes (les más numberoses) y places públiques. Éstes yeren financiaes pola Conseyería de Bienestar Social. Los usuarios y usuaries d’estes places públiques amás pagaben terapies privaes. Tamién allegaben pacientes particulares a consultes privaes.

Faíense terapies a casa y valoraciones. En Xixón había una consulta nel despachu del Hotel d’Asociaciones del Conceyu Xixón y n’Uviéu emprestábense servicios de rehabilitación nun despachu del Hotel d’Asociaciones al traviés d’un conveniu con COCEMFE. El númberu d’usuarios yera’l más numberosu dende la puesta en marcha de l’Asociación.

En febreru de 2013 empieza una situación d’impagos que s’enllarga demientres tol añu y finalmente, n’avientu, piésllase’l centru trabayu. Vendieron material de rehabilitación, moblame, los dos microbuses…y siguen debiendo 4 nómines y la lliquidación de los y les trabayadores.