La CSI sofita y participa na manifestación del 8 de septiembre

LLAMAMIENTU DE LA CSI A PARTICIPAR NA MANIFESTACIÓN DEL 8 SETIEMBRE

La Corriente Sindical d’Izquierda fae un llamamientu a tola clas obrera asturiana a participar na manifestación del próximu llunes 8 setiembre que, sol lema “Pa tresformar Asturies. Lluchando pola Soberanía”, va dar empiezu a les 12:30 h., del Paséu los Álamos d’Uviéu.

El próximu 8 Setiembre, el Gobiernu asturianu y los partíos de la Xunta Xeneral, van cellebrar una nueva farsa institucional nel “Día d’Asturies”. Una Xunta Xeneral inútil y un Gobiernu desaparecíu, pretenden festexar los sos privilexos y esconder les penoses condiciones de vida que carez la mayor parte de la clas obrera asturiana.

Esti 8 de setiembre, la clas obrera asturiana nun tien nada que cellebrar y sí abondo polo que lluchar: pol so derechu a decidir; a decidir sobre los sos recursos económicos, a decidir sobre la so lexislación llaboral, les polítiques financieres y d’empléu, la propiedá de la banca y los recursos enerxéticos, a decidir sobre la so Sanidá, la so Educación o los sos Servicios Sociales y, a lo cabero, a decidir sobre tolo qu’afeute a los sos derechos, al so presente y al so futuru.