II Alcuentros alternativos y populares de Bimentes, 6 y 7 setiembre

ESCONTRA LA FARSA INSTITUCIONAL DEL 8 SETIEMBRE (Día d’Asturies): ¡ASTURIES EN PIE!

II ALCUENTROS ALTERNATIVOS Y POPULARES DE BIMENES. 6 Y 7 SETIEMBRE. BIMENES. ASTURIES.

El próximu 8 Setiembre, el Gobiernu asturianu y los partidos de la Xunta Xeneral, van cellebrar una nueva farsa institucional nel “Día d’Asturies”.

Pero, el panorama nun ta pa cellebraciones. Una Xunta Xeneral inútil y un Gobiernu desapaecíu, pretenden festexar los sos privilexos y tapecer la miseria na que vive la mayor parte de la clas obrera asturiana.

Un trabayu dignu, una vivienda, un hospital, una escuela, la universidá, incluso les melecines, la ellectricidá o’l gas, entamen a tornase en luxos enforma caros que los y les trabayadores yá nun podemos permitinos. Hasta los mesmos alimentos dexaron de tar garantizaos pa toos y toes.

Mientres, unos pocos emborráchense de dineru y poder a cuenta la miseria de munchos y el dineru que necesitamos pa sobrevivir desaníciase peles alcantarielles de la corrupción y les estafes de la banca y la patronal.

Tamos gobernaos por una banda criminales al serviciu d’un sistema entá más criminal, porque criminal ye’l sistema capitalista y criminales son quienes tán nos poderes políticos y económicos amasando fortunes y espetando un sufrimientu al Pueblu, que yá nun debemos siguir tolerando

Pero, el simple fechu de protestar puede llevanos direutamente a la cárcel. La represión yá ye xeneralizada, la Xusticia dexó de ser ciega y la so balanza inclínase del llau de los poderosos. Por ello, cada persona represaliada tien de ser l’oxetivu prioritariu de la nuesa solidaridá: ¡nin una sola persona sola énte la represión!.

Nesti sen, dende ¡Asturies en Pie! yá se sufragaron les fiances y les multes de dellos collacios y collacies encausaes nel conflictu mineru, la fuelga xeneral del 14-P, la llucha a la escontra’l paru, pol albuertu llibre, etc. Munchos d’estos xuicios van tener llugar a la fin de 2014 o l’entamu de 2015.

Los próximos díes 6 y 7 setiembre ¡Asturies en Pie! convoca los II Alcuentros Alternativos y Populares de Bimenes. Dientro unos díes vamos faer públicu l’horariu y actividaes que vamos desendolcar nestos Alcuentros. Y el dineru que se recalde va dedicase íntegramente al sofitu a les persones encausaes por participar nes estremaes lluches llaborales y sociales que tán teniendo llugar n’Asturies.

La clas obrera asturiana tien de ponese en pie y faer frente a tola farsa institucional.

¡VÉMONOS EN BIMENES!. ¡VÉMONOS NA CAI!.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU, CENTRU SOCIAL LA LLUME).

ÚLTIMA HORA – ENRIQUE VILLARREAL (EL DROGAS), EX-CANTANTE Y BAXISTA’L GRUPU BARRICADA, VA ACTUAR NEL CONCIERTU COLA SO BANDA, DES MEMORIA BAND, DE LOS II ALCUENTROS ALTERNATIVOS Y POPULARES DE BIMENES, ASTURIES, EL PRÓSIMU 6 DE SETIEMBRE.

AMÁS D’ELLO, VA INTERPRETAR DELLOS TEMES NEL HOMENAXE A LOS Y LES LLUCHADORES ANTIFACISTES QUE VAMOS FACER NEL POZU FUNERES.