Solidaridá cole/los trabayaores d’Unisono

Dende la seición sindical de la Corriente Sindical d’Izquierda na empresa Instalaciones Eléctriques Sanvicente (contrata d’EDP), queremos sopelexar el nuesu sofitu y solidaridá pa colos y coles trabayadores de la empresa UNISONO, tamién contrata d’EDP, que s’encarga del serviciu telefónicu d’atención al veceru d’EDP n’Asturies.

Los emplegaos y emplegaes d’esta empresa entamaron, el pasáu 18 Agostu, una riestra paros d’una hora en cada turnu, tres hores al día en total, tolos llunes, pel intre, hasta’l día 9 Setiembre pa desixir que la empresa UNISONO realmita a los sos compañeros y compañeres despidíes y ponga fin al acosu constante que sufren los y les trabayadores.

La empresa lleva meses despidiendo a emplegaos y emplegaes cola disculpia del “amenorgamientu voluntariu del rendimientu trabayu” y acosando al restu, obligándolos a amenorgar el tiempu de cada llamada y aumentando les xestiones a realizar, so l’amenaza despidu.

Los emplegaos y emplegaes sufren, dende va años, contratos de trabayu de 5 hores diaries partíes a lo llargo de tola selmana, trabayando festivos y fines de selmana y faciendo imposible conciliar el trabayu cola vida familiar; unes condiciones llaborales que, llegales o non, son aberrantes y esplotadores. Amás de too ello, esta empresa permítese’l gran luxu d’acosar a les trabayadores con táutiques como les mentaes enantes o llegando inclusive a llevar a trabayadores soles a una sala con dellos direutivos pa “echa-yos la bronca”.

En CSI-Sanvicente consideramos a cualisquier trabayador o trabayadora de cualquier contrata d’EDP como compañeru y compañera direuta y solidarizamonos coles sos reivindicaciones, desixendo que se cumplan darréu, yá que na mayoría contrates d’EDP, sufrimos estes condiciones, que yá nun pueden llamase de precariedá, sinón de rotunda esplotación, demientres qu’EDP amasa beneficios millonarios y el recibu de lluz y gas nun dexa de xubir hasta les nubes nos nuesos llares.

A la entrada d’UNISONO, que la so see atópase en Xixón y non en Madrid o Sudamérica, como puede pensar muncha xente, hai un cartelu de dellos metros d’altor, instaláu por EDP que reza: “MÁS DE 10 APASIONANTES AÑOS TRABAYANDO XUNTOS”; y nun miente, el grau d’esplotación de los y les trabayadores d’UNISONO yá llevanta pasiones na so see tolos llunes y a EDP apasióna-y descomanadamente la superplusvalía xenerada.

Munchu ánimu y puxu, compañeros y compañeres d’UNISONO.