Manifestación escontra’l pieslle y los despidos nel Mataderu central d’Asturies

CONVOQUEN: ASAMBLEA TRABAYADORES DEL MATADERU CENTRAL Y ASAMBLEES DE TRABAYADORES EN LLUCHA N’ASTURIES

El Mataderu Central d’Asturies ta en concursu d’acreedores. La totalidá de el trabayadores y trabayadores llevamos sufriendo 6 meses d’impagos y nun somos responsables d’esta situación.

La mala xestión de la xerente Ana Presa Ríu y unes “sospechoses” decisiones empresariales garraes nes caberes dómines, engavitaron decisivamente pa llegar a esta situación.

Nun vamos permitir el pieslle la empresa nin vamos pagar les consecuencies de la mala política empresarial. Somos una empresa vidable, de xuru con otra Dirección, que nun s’enfote n’esbardiar esfuercios pa minar los derechos llaborales d’una plantía, calificada por delles auditoríes esternes como esperta, profesional y bien capaz.

Por instalaciones, capacidá, situación, volume de carga trabayu y una plantía competitiva, somos la empresa puntera’l sector n’Asturies. Un posible zarru o amenorgamientu l’actividá tendríe graves consecuencies en dellos coleutivos como tresportistes, ganaderos y restu d’empreses cárniques, asina como na mesma economía de los conceyos de Siero y Noreña, onde vivimos gran parte de los y les trabayadores.

Queremos que se pidan responsabilidaes a quien nos emburrió hasta llegar a la situación d’anguañu y que nun se-yos dexe llevar a cabu esta estratexa de llibrase de la plantía col menor costu posible o realizar brutales retayos nes condiciones llaborales.

Pidimos y desiximos una implicación de les instituciones autonómiques, que dexen reconducir esta situación, salvaguardando los intereses de la parte más desprotexía, que somos los y les trabayadores.

Dende l’Asamblea Trabayadores del Central vamos defender el futuru de les nueses families y a lluchar a la escontra’l desmantelamientu económicu y llaboral d’Asturies.

¡NEL MATADERU Y N’ASTURIES: NIN PIESLLES NIN DESPIDOS!.

¡EL CENTRAL NUN SE PIESLLA!.