Comunicáu de la CSI sobre Caxastur

LA CSI DENUNCIA QUE LA DIREICIÓN DE CAXASTUR/LIBERBANK PRETENDE CONTROLAR LA FUNDACIÓN CAXASTUR, PA CONSOLIDAR LA SO ESTRATEXA CLIENTELAR Y DE PAGU DE FAVORES POLÍTICOS.

Ante la constitución de la Fundación Caxastur como resultancia’l procesu de privatización/lliquidación de la Caxa d’Aforros d’Asturies y énte la cellebración d’una Asamblea Estraordinaria de la entidá’l próximu día 23, na que va aprobase’l so tresformamientu en Fundación Bancaria, la Corriente Sindical d’Izquierda sopelexa lo que vien darréu:

Esti tresformamientu en Fundación d’una Caxa d’Aforros constitúi’l caberu tramu d’un procesu privatización/lliquidación que sustrai a los asturianos y asturianes la entidá financiera de referencia demientres más de 130 años, motor indiscutible del desenvolvimientu económico y social d’Asturies en tou esi periodu. Esti procesu, un atracu de monumentales proporciones a la sociedá asturiana, foi pilotáu pol equipu direutivu de Caxastur qu’agora blindóse como direutivos de Liberbank, que la so nefasta xestión dio llugar a la situación d’anguañu, con miles de millones d’euros soterraos nel Bancu Malu, l’aplicación de EREs fraudulentos a los y les trabayadores, tantu de Liberbank como de la Obra Social y Cultural de Caxastur, prexubilaciones millonaries pa direutivos, cientos de demandes de veceros afectaos pola delda subordinada y les participaciones preferentes y una imaxe pelos suelos pola mor de la so política antisocial en casos como los desahucios, SEDES, Hotel León, etc.

Los estatutos de la Fundación Caxastur fueron ellaboraos de tal manera que dexen l’usu de los fondos de dicha fundación p’actividaes que nada tienen que ver con favorecer el progresu d’Asturies, como ye la so obligación, sinón col usu d’esos fondos pal pagu de favores políticos per parte l’equipu direutivu de Caxastur/Liberbank, tantu dientro como fuera d’Asturies. Con estos estatutos van poder siguir pagándose, con dineru de los asturianos y asturianes, millones d’euros pa los fastos del Aniversariu del Greco en Toledo o van poder subvencionase con decenes de miles d’euros la Escuela de Branu d’UXT, como se lleva faciendo hasta agora.

Cola eleición como miembros del Patronatu de persones de reconocíu prestíxu intelectual y científicu, la direición de Caxastur/Liberbank pretende cubrir con un mantu d’honorabilidá la so intención de siguir controlando’l día ente día de la Fundación Caxastur como fonte financiamientu de los sos sofitos políticu y social. La CSI espera qu’estes persones nun s’empresten a sirvir de tapadoria a la nefasta xestión de dichu forno direutivu y qu’esixan un funcionamientu llimpiu y tresparente, que sustituya a la opacidá y el ocultamiento que fueron la norma de la xestión tantu en Caxastur/Liberbank, como na Obra Social y Cultural de Caxastur.

De ser ciertes les noticies alrodiu la intención de los grupos políticos de la Xunta Xeneral del Principáu de proponer como presidente de la Fundación Caxastur a Manuel Menéndez, presidente de Caxastur y de Liberbank y cimeru responsable de la nefasta xestión que llevó a la Caxa a la so situación d’anguañu, esto supondría pa la CSI la confirmación del grau de complicidá de la clase política asturiana cola privatización/lliquidación de Caxastur y del nivel de podrigañamientu de la política institucional n’Asturies.

Pa protestar a la escontra la privatización de Caxastur, pa reivindicar una banca pública al serviciu la xente y pa desixir xuiciu y castigu a los direutivos y a los políticos que saquearon les Caxes, la CSI convoca una concentración coincidiendo cola Asamblea Estraordinaria de Cajastur, el miércoles próximu, 23 de xunetu, a les cinco la tarde, énte l’hotel de de la Reconquista n’Uviéu. Nel cursu de dicha concentración escenificaráse l’entierru de Caxastur que tán llevando a cabu los direutivos de la entidá y los sos aliaos políticos.

https://www.change.org/es/peticiones/asamblea-de-cajastur-junta-general-del-principado-de-asturias-que-la-fundaci%C3%B3n-cajastur-invierta-en-obras-sociales-para-favorecer-el-desarrollo-en-asturias-y-que-los-responsables-de-la-situaci%C3%B3n-actual-de-cajastur-queden-al-margen-del-patronato-de-la?recruiter=129328110&utm_campaign=mailto_link&utm_medium=email&utm_source=share_petition