Movilizaciones de l’Asamblea de trabayadores del mataderu central de Asturies

AICIONES INFORMATIVES:

-Sábadu 19 xunetu, nel Mercáu de Noreña, de magar les 10:30 h.

-Llunes 21 de xunetu, nel Mercáu de ganáu de La pola Siero, de magar les 07:30 h.

-Martes 22 de xunetu, nel Mercadín de La Pola Siero, de magar les 10:30 h.

El Mataderu Central presentó, el día 11 xunetu, la solicitú de concursu voluntariu d’acreedores. La xerente, Ana Presa, decidió parar les llinies de produición, lo que foi denunciáu énte Inspeición de Trabayu como un ERE tapáu, que persigue empiorar la situación al dexar d’emprestar servicios a los nuesos veceros.

N’atropando ente 2013-2014 cinco meses d’impagos, los y les 94 trabayadores tamos na cai. Llegamos a esta situación tres delles sanciones a la empresa, por incumplimientu grave de la normativa llaboral y pola mala xestión d’una xerencia que pretende pesllar la empresa y llibrase de la plantía col menor costu posible.

Somos la mayor empresa cárnica d’Asturies, con casi’l 50% la produición total, la única con certificáu medioambiental integral y coles meyores instalaciones. El zarru’l Mataderu Central supón una perda importante de puestos de trabayu, nuna Asturies que nun puede permitise nin un despidu más y que va tener una grave repercusión nel seutor, con influencia dende tresportistes a ganaderos, que va favorecer menos movimientos de trabayu y la cayida precios.

Agora, los y les trabayadores del Mataderu Central permanecemos n’Asamblea Permanente nes instalaciones de la empresa, pa desixir la continuidá de l’actividá llaboral y de la totalidá los puestos de trabayu.

Pidimos el sofitu de los seutores afectaos, del pueblu asturianu y la implicación de les instituciones pa iguar la situación. Queremos trabayar y queremos cobrar.

¡EL CENTRAL NUN SE PIESLLA!