Comunicáu de los/es trabayaores del mataderu central d’Asturies

LOS Y LES TRABAYADORES DEL MATADERU CENTRAL ZÁRRENSE NES INSTALACIONES DE LA EMPRESA Y DECLÁRENSE N’ASAMBLEA PERMANENTE.

El pasáu vienres 11 xunetu, comunicósenos a los y les trabayadores del Mataderu Central d’Asturies, tres otru nuevu impagu (anguaño extra de branu y mes xunu), la solicitú, per parte la empresa, de concursu voluntariu d’acreedores.

De la mesma, diéronsenos cartes a dellos trabayadores “excusandonos” de dir a trabayar dende’l llunes 14 xunetu; al restu van dir apurriéndo-yles a lo llargo d’esta selmana.

El mesmu vienres allegamos a poner denuncia a Inspeición Trabayu porque esta maniobra nun ye más qu’una desocupación efeutiva del centru, un ERE tapáu, un pieslle patronal.

Ente los trabayadores “escusaos de dir al trabayu” tamos, de casualidá, miembros del Comité d’Empresa.

Too esto vien dempués de dellos actos de conciliación y dellos xuicios por impagos, que tán siendo desfavorables a los intereses de la empresa.

A les 12:00 de güei (martes 15 de xunetu), realizamos una asamblea nel comedor de la empresa, pa lo cual tuvimos que superar la prohibición de los guardias de seguridá y de los axentes de la Guardia Civil. Dende esti mesmu momentu, los y les trabayadores del Mataderu Central declarémonos n’Asamblea Permanente, en defensa de la continuidá llaboral y de la totalidá los puestos de trabayu.

Siguiendo l’exemplu del restu d’Asamblees de Trabayadores en Llucha n’Asturies, decidimos que, dende güei, vamos furrular como Asamblea, cola esperiencia d’estos y estes trabayadores, que nos tán ayudando y apurriendo asesoramientu llegal y xurídicu, pero ensin que dengún lliberáu de dengún sindicatu nin seición sindical decida nin axuste, absolutamente nada, por nós.

Dende les 14:00 de güei, martes 15 de xunetu, dellos compañeros atópense zarraos na empresa y tamos iguando les veces cola fin de nun abandonar les instalaciones.

Nos próximos dies vamos aconceyar cola Conseyería d’Agroganadería y vamos entamar una campaña d’información y movilización:

-Xueves 17 xunetu, nel mercáu de ganáu de La Pola Siero.

-Sábadu 19 xunetu, nel Mercáu de Noreña.

-Martes 22 de xunetu, nel Mercadín de La Pola Siero.