CSI sofita la movilización de los/les trabayadores del Hotel León

La Corriente Sindical d’Izquierda, al traviés de la so seición sindical en Caxastur encamienta a la direición de Liberbank a atender les xustes reclamaciones de les y los trabayadores del Hotel León

Los y les trabayadores del Hotel León lleven más de cinco meses zarraos nes instalaciones de dichu hotel, reivindicando la continuidá la empresa y el caltenimientu de los sos puestos de trabayu.

Gracies a la presencia de los y les trabayadores nel Hotel León, esti caltiense en perfectu estáu de caltenimientu y llistu pa siguir funcionando en cuanto un nuevu propietariu se faiga cargu d’él. Ye conveniente recordar que dichu Hotel ye vidable y rentable, yá que la so actual situación débese a les inversiones fallíes n’otros establecimientos y a la falta profesionalidá de los antiguos direutivos.

Anguaño, la solución satisfactoria a la situación del Hotel y los sos trabayadores depende de la direición de Liberbank, propietaria l’edificiu y responsable d’esta empresa y de los puestos de trabayu que xenera.

La dirección de Liberbank ta retrasando l’alxudicación de dichu edificiu, una vegada concluyíu’l plazu presentación d’ufiertes, faciendo cada día más angustiosa la situación de les y los trabayadores afeutaos y ensin esclariar si la lóxica esixencia de caltenimientu de l’actual plantía va ser el fautor determinante de dicha alxudicación, como debería de ser, entá ye más cuando Caxastur (caxa orixen de Liberbank) siempres tuvo considerancia d’entidá de calter benéficu-social, polo que la continuidá d’una empresa vidable y el caltenimientu de los puestos de trabayu tendría de ser un oxetivu prioritariu, teniendo en cuenta la situación del paru n’Asturies.

Por tolo anterior, la seición sindical de la Corriente Sindical d’Izquierda en Caxastur encamienta a la direición de Liberbank a atender les xustes reivindicaciones de los y les trabayadores del Hotel León y a dar una solución positiva a la so situación.

Igualmente, la CSI sofita la concentración convocada pola Asamblea de Trabayadores del Hotel Llión, el próximu llunes 14 xunetu, a les 11 de la mañana na Plaza’l Carmen de Xixón, frente a la Oficina Principal de Caxastur.