¡Asturies en pie! Marcha-manifestación Contra’l paru y l’esplotación llaboral

¡ASTURIES EN PIE!.

Con más de 100.000 trabayadores en paru, Asturies nun puede permitise nin un solu paráu o parada nin un solu despidu nin un solu pieslle d’empresa nin una sola hora extra más.

El númberu persones en paru que yá nun cobren nada, aumenta darréu; al igual que’l númberu families con tolos sos miembros en paru. El restu malvive con subsidios o aídes miserables o vese obligáu a emigrar.

Y el pocu trabayu qu’hai ye precariu, casi siempres ensin cotización a la Seguridá Social pa toles hores trabayaes, con sueldos que nun merecen esi nome, con escesu d’hores de trabayu so menacies de despidu, con parte’l sueldu pagu en prietu, etc.

Mentantu, el dineru que precisamos pa sobrevivir súmese peles alcantarielles de la corrupción y l’avaricia de banqueros, empresarios y gobernantes.

Por too ello, tán produciéndose n’Asturies numberosos conflictos llaborales y sociales que tán dando llugar a mamplén de persones deteníes, cutíes, multaes, enxuiciaes y con pidimientos de cárcel, pol simple fechu de defender los sos derechos.

La Xusticia yá nun ye ciega y la so balanza inclínase del llau de los poderosos. El sistema capitalista que nos gobierna quierlo too y nun va duldar un intre n’emprobecenos hasta la miseria, con tal d’aumentar los sos beneficios. Na nuesa mano ta torgalo.

¡BASTA DE PARU Y D’ESPLOTACIÓN LLABORAL!. ¡BASTA DE REPRESIÓN POR DEFENDER LOS NUESOS DERECHOS!.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).