Presentación pública de los llocales reivindicados pola CSI na Casa sindical d’Avilés

CSI-AVILÉS

CHARRA-ALDERIQUE: “SINDICALISMU DE CLAS Y MOVIMIENTU A LA ESCONTRA’L PARU, N’ASTURIES”.

VAN INTERVENIR:
– SAMUEL SÁNCHEZ, RESPONSABLE XENERAL DE LA CSI
– RUBÉN DÍAZ, MIEMBRU DE PARA@S Y PRECARI@S D’ASTURIES
– PACO IGLESIAS, RESPONSABLE DE CSI-AVILÉS.

FUERA LA PATRONAL DE LA CASA SINDICAL.

Nun se trata namá d’unos llocales. La Casa Sindical ye de los y les trabayadores y tien d’utilizase pa defender los derechos de la clas obrera, los derechos populares. Nun podemos dexar que la Casa Sindical, la Casa de la Clas obrera, siga en manes de quien planifiquen la nuesa miseria y la nuesa esplotación llaboral.

LA CORRIENTE SINDICAL D’IZQUIERDA TORNA REIVINDICAR EL SO DERECHU A UTILIZAR LES INSTALACIONES ABANDONAES DE LA CASA SINDICAL D’AVILÉS.

La corriente Sindical d’Izquierda tornó reivindicar el so derechu a utilizar los llocales de la primer planta de la Casa Sindical d’Avilés, que, magar tar asignada a la Federación Asturiana d’Empresarios (FADE), nunca foi utilizada por esta Federación y atópase nun estáu d’abandonu dafechu.

Enantes, en 2010, la CSI yá denunciare esti abandonu y reivindicare l’usu d’estos llocales, solicitando énte’l Ministeriu Trabayu’l so usu en beneficiu de los y les trabayadores.

Nesta Casa Sindical atópense los sindicatos CCOO, UXT y USO. Amás d’ello, la primer planta, nel so momentu, foi cedida a la FADE.

Pela so parte, la FADE nunca llegó a utilizar estos llocales y, ello ye que dende va años, tien la so see, n’Avilés, nel Centru Municipal d’Empreses asitiáu na cai Gutiérrez Herrero 52. Mentantu, los llocales alxudicaos a la FADE na Casa Sindical d’Avilés, atópense n’estáu d’ABANDONU DAFECHU, llegando, inclusive, a ser utilizaos como almacén de ferramienta y material de les obres realizaes nes instalaciones de la Casa Sindical.

La primer reivindicación d’estos llocales, per parte la CSI, dio llugar a un Atestáu Policial nel que consta la declaración de los Axentes, ratificando nel so informe presentáu énte’l Xulgáu, l’estáu d’abandonu de les instalaciones.

Pa la CSI, el Ministeriu Trabayu tien de retirar darréu la cesión de los llocales a la FADE, pol incumplimientu dafechu, per parte d’esta Federación, de los fines pa los que-y fueron concedíos dichos llocales.

En concretu, el Reglamentu de la Llei de Padrimoniu Sindical Acumuláu inclúi, nel so artículu 11.b, como causa d’estinción de la cesión de locales: “L’incumplimientu pol cesionariu de cualisquier de los requisitos o términos a los que se supeditó’l otorgamientu la cesión o por destinar los bienes cedíos a fines estremaos de los autorizaos o perxudicalos por un usu indebíu o abusivu”

La FADE non yá nun utilizó nunca estos llocales, sinón que los utilizó pa fines non debíos y, con ello, inclusive ta favoreciendo’l deterioru de les mesmes instalaciones.

Por too ello, la CSI torna reivindicar énte’l Ministeriu Trabayu, la desixencia de que se ponga fin a la cesión d’estos llocales a la FADE, por usu indebíu de los mesmos, y se-y concéda’l derechu a utilizar estes instalaciones, talu y como reconoz el propiu Ministeriu Trabayu.