La CSI esixe al Conceyu d’Avilés l’apertura d’una investigación pa depurar responsabilidaes pola intoxicación por cloru de 2008

El 7 payares de 2008 producíase na piscina municipal avilesina de La Madalena, una intoxicación por cloru de 4 trabayadores. Les mancadures de dos d’ellos provocaron secueles irreversibles tan graves que dieron llugar a la so xubilación por incapacidá pa siguir trabayando. Los otros dos trabayadores, que resultaron tamién intosicaos, pudieron siguir nel so puestu de trabayu.

Tanto la Inspeición de Trabayu, como la Seguridá Social y el Tribunal Superior de Xusticia dictaron, n’estremaes informes y sentencies, la responsabilidá del Ayuntamientu nesti accidente.

Asina, l’Institutu Nacional de la Seguridá Social dictó un Resolvimientu nel que se sopelexaba:

1-La esistencia de responsabilidá empresarial por falta de midíes de seguridá ya hixene nel trabayu pol accidente sufiertu nes piscines municipales d’Avilés el 7 payares de 2008.

2-La procedencia de que les prestaciones d’incapacidá temporal derivaes del accidente de trabayu citáu y de toes aquelles prestaciones de seguridá reconocíes o que pudieren reconocese nel futuru, derivaes del mesmu accidente de trabayu, sían amontaes nun 30%.

De resultes d’ello, l’Alministración declaróse responsable del pagu del consiguiente recargu prestaciones a los trabayadores afectaos. D’esta miente, la cantidá de dineru que l’Ayuntamientu tien d’abonar a los trabayadores afeutaos, algama los 360.000 €, de los cualos 160.000 cuerren a cargu les aseguradores, en conceutu d’indemnizaciones, y unos 200.000 a cargu les propies arques municipales, en conceutu de recargu prestaciones.

Sicasí, los responsables municipales siempres negaron la esistencia l’accidente y siguen afitando que too ta controláu y les condiciones ambientales escrupulosamente midíes. L’Ayuntamientu, magar ser declaráu responsable l’accidente, en dengún momentu dio en pescudar los fechos asocedíos con cuenta determinar los posibles culpables y les consiguientes responsabilidaes.

Na CSI camentamos que los fechos asocedíos naquel 7 payares de 2008 fueron prebaos y tienen la entidá y la gravedá abondes pa que l’Ayuntamientu decrete l’apertura d’una investigación empobinada a determinar los posibles culpables y el consiguiente espediente de responsabilidá disciplinaria frente a les persones que pudieren ser declaraes responsables en dicha investigación.