La CSI refuga tajantemente la sentencia de l’audiencia nacional que respuende por el segundu ERE de Liberbank y estudia un recursu ante’l tribunal supremu

CSI-CAXASTUR (LIBERBANK).

La Corriente Sindical d’Izquierda, sindicatu mayoritariu en Caxastur, manifiesta’l so refugu tayante y absolutu a la sentencia de la Sala de lo Social de l’Audiencia Nacional qu’avala los retayos salariales (ente’l 18% y el 30%, más la perda beneficios sociales) en base a una supuesta necesidá ineludible d’estos retayos pa garantizar el futuru la entidá.

Pa la CSI, tantu’l plan que la direición de Liberbank presentó a les autoridaes europees, con previsión de beneficios de centenares de millones d’euros pa los cuatro años de duración del ERE, como los beneficios publicaos nos últimos tiempos pola mesma entidá, desmienten tayantemente’l razonamientu de l’Audiencia sobre la situación económica de Liberbank y asoleyen que, llueñe de contrastar les cifres presentaes pola direición cola documentación y los estudios económicos presentaos polos sindicatos recurrentes, los xueces que componen el tribunal llindáronse a dar por bona la doble contabilidá de la direición de Liberbank, que presenta perdes o beneficios en función de los sos particulares intereses.

Por otru llau, el mesmu tribunal nun esaminó, magar lo solicitao polos sindicatos recurrentes, la contabilidá d’un marañu de decenes d’empreses instrumentales (ente elles, Beyos y Ponga, que s’utilizó pa la recompra de La Talá, operación que ta siendo investigada pola policía arriendes de una denuncia de la CSI por posible delitu societario) que s’utilicen pa despintar o aprucir perdes y beneficios a comeniencia de la direición de Liberbank.

A lo cabero, la CSI camienta que con esta inxusta sentencia, l’Audiencia Nacional ta mandando un mensaxe a la Banca y a la Gran Patronal (úniques empreses que pueden permitise estos artificios contables) pa que, aprovechando la xenocida reforma llaboral y remanando descaradamente la contabilidá de les sos empreses, impongan a los y les trabayadores esta triba de xabaces retayos salariales inxustificaos ya inxustificables, por culpa de que van dase por bonos nos tribunales ensin dengún tipu d’analís rigorosu.

Por too ello, la CSI ta estudiando les posibilidaes de recursu llegal énte’l Tribunal Supremu a la escontra d’esta sentencia.