Concentración escontra la privatización del Serviciu de Primera Acoyida

CSI-ALMINISTRACIÓN

La CSI opónse a la privatización del serviciu de la UPA (Unidá de Primera Acoyida).

La Conseyería de Bienestar Social sigui privatizando servicios y convoca la llicitación del serviciu de primera acoyida pa los menores tutelaos pola Alministración nel Fundoma, demientres el Centru Maternu Infantil ta per baxu la so capacidá.

Los servicios públicos garanticen una atención calidable a los usuarios y un respetu a los derechos y condiciones llaborales de los y les trabayadores. Nel casu que nos ocupa lo que ta en cuestión ye la proteición y defensa d’una vida meyor pa los menores que viven tutelaos pola alministración.

Esta atención tien de siguir siendo pública, na titularidá y tamién na xestión; ye por eso que nos oponemos a que la Unidá de Primera Acoyida pase a entidaes privaes y defendemos que’l Centru Maternu Infantil, centru de referencia na atención a menores, non se dexe languidecer y morrer pola Conseyería de Bienestar Social, como ta asocediendo agora.

Namás dos exemplos ilustrativos de lo qu’asocede nel Maternu: anguañu namás hai 27 places de menores ocupaes (24 na unidá del menor y 3 na UPA), y les vacantes na plantía de trabayadores va tiempu que nun se cubre (2 auxiliares-educador, 1 téunicu, 1 educador, 1 ayudante de cocina…). Y demientres, con una falta d’ética dafechu, la Conseyería permítese llicitar el serviciu de la UPA con empreses ayenes, que nunca van poder garantizar una atención digna a una población tan vulnerable como los menores tutelaos.

¡POR UNOS SERVICIOS SOCIALES PUBLICOS Y CALIDABLE!