Comunicáu de la CSI sobre l’ampliación de capital de Liberbank: continúa l’espoliu de Caxastur

La Corriente Sindical d’Izquierda denuncia públicamente l’ampliación de capital de Liberbank como una maniobra a favor d’especuladores estranxeros, una fuxida p’alantre del equipu direutivu del bancu en defensa de los sos particulares intereses y un pasu más nel procesu de privatización/lliquidación de la Caxa

Énte’l procesu d’ampliación de capital de Liberbank la CSI sopelexa que tala operación constitúi un pasu más nel procesu privatización/lliquidación de Caxastur, un espoliu ensin precedentes a la sociedá asturiana, por aciu’l cual arrampúñasenos la entidá financiera de referencia pa los asturianos y asturianes y saquéase’l padrimoniu acumuláu demientres más de cientu trenta años pa ponelo en manes d’especuladores estranxeros que, cola complicidá l’equipu direutivu de Caxastur/Liberbank, apodérense de la Caxa de tolos asturianos y asturianes.

Con esta nueva maniobra, l’equipu direutivu de Caxastur/Liberbank defende solamente los sos intereses económicos y les sos ambiciones personales, como lleva años faciendo, ensin qu’inda rindiere cuentes sobre la so nefasta xestión, que supunxo llevar a la Caxa a la situación d’anguañu, contraria dafechu al so propósitu fundacional y a la so trayeutoria de compromisu con Asturies.

Con esta ampliación de capital, qu’esllee’l control de les caxes sobre Liberbank y refuercia’l poder del equipu direutivu y los sos socios, dichu equipu direutivu intenta torgar la posibilidá de que, primero o más sero, se-y pidan cuntes sobre la so actuación como caballos de troya de la privatización/lliquidación desque dirixíen Caxastur, incumpliendo la so obligación, astronómicamente retribuida, de velar polos intereses de la Caxa que dirixíen.

La CSI recuerda que, ente otres irregularidaes, la direición de Liberbank vio anuláu pola Audiencia Nacional un ERE fraudulentu, pol que deben a los y les trabayadores 67 millones d’euros, ta perdiendo cientos de pleitos por comercializar delda subordinada y participaciones preferentes y ta siendo investigada nos xulgaos pola recompra de La Talá, una finca non urbanizable, pagando por ella 47 millones d’euros a Nozar Masaveu, dempués de que se viniera embaxo’l pelotazu urbanísticu que se proxectaba nella.

Pa la CSI, resulta particularmente vergonzoso que, en plena campaña eleutoral, los políticos asturianos nun pidieren esplicaciones sobre una operación de tanta transcendencia y con tantes implicaciones de futuru pa la economía d’Asturies.

Cuando más falta fai una entidá como la Caxa, comprometida con Asturies y cola difícil situación que tán viviendo los asturianos y asturianes, los direutivos de Caxastur/Liberbank siguen col so esmantelamientu y la so vienta a precios de saldu ensin que, per parte de quien tienen la obligación de velar polos intereses coleutivos, se tome denguna midía pa torgar esti saquéu a la riqueza coleutiva.