Manifestación: La CSI opónse al desallugu de la Madreña n’Uviéu

La Corriente Sindical d’izquierda quier asoleyar la so oposición al desallugu del Centru Social La Madreña, ordenáu pola Audiencia Provincial, atendiendo al recursu presentáu pola empresa SEDES, propietaria llegal del inmueble.

La empresa SEDES, con importante participación pública, que güei ta práuticamente en situación de quiebra por cuenta d’una nefasta xestión de los sos responsables, ye la propietaria del solar y del edificiu nel que, dende hai años, vien funcionando’l CSOA La Madreña.

Esti edificiu, antigua Conseyería Salú, pasó de manos públiques a privaes nel marcu d’una operación d’especulación inmobiliaria cola Sociedá Xovellanos XXI y nél pretendíase nel so momentu construyir viviendes de luxu, proyeutu paralizáu pola cris inmobiliaria que supunxera una degradación del llocal y el solar demientres los años en que tuvo paráu. Un claru exemplu de como la privatización de lo público acaba sirviendo pa enllenar los bolsos d’empresarios privaos.

Anguaño, los y les trabayadores despidíes de SEDES caltienen un enzarru nes sos antigües oficines y siguen un procesu de llucha pola recuperación de los sos puestos de trabayu y los sos derechos llaborales.

Despidos y pelotazos urbanísticos ye lo único que s’escuende detrás d’esti desallugu.

En contraposición a ello, La Madreña convirtió esi edificiu públicu nestos años nun referente cultural, social y solidariu y les sos iniciatives repercutieron dafechu na sociedá, na ciudá, nel barriu y tou ello a costu cero pal ciudadanu.

Y nun intre nel que’l sistema social y políticu arrobina l’individualismu como bandera, espacios de solidaridá como’l que representa La Madreña, debe de siguir esistiendo.