Los monitores municipales de les piscines d’Avilés desixen soluciones a los problemes de seguridá y prevención

Los monitores municipales de natación de les piscines avilesines, caltuvieron una xunta cola responsable del área, la conceyala Ana Hevia, pa desixi-y midíes de prevención y seguridá nel trabayu.

En 2008, un escape cloru provocó la intoxicación de 4 monitores. Les mancadures de dos d’ellos provocaron secueles irreversibles tan graves que dieron llugar a la so xubilación por incapacidá pa siguir trabayando. Otros dos tienen mancadures permanentes que, sicasí nun-yos torguen siguir nel so puestu de trabayu.

Tanto la Inspeición de Trabayu, como la Seguridá Social y el Tribunal Superior de Xusticia dictaron, en distintes sentencies ya informes, la responsabilidá del Conceyu nesti accidente.

D’esta miente, la cantidá de dineru que’l Conceyu tien d’abonar a los trabayadores pola so responsabilidá nesti accidente, xube a unos 360.000 €, de los cualos 160.000 € cuerren al cargu de les aseguradores, en conceutu d’indemnización, y unos 200.000, al cargu de les propies arques municipales, en conceutu de recargu prestaciones.

Sicasí, y a pesar d’estes sentencies, los problemes siguieron ensin que naide-yos ponga solución. Dende 2008, les denuncies de el monitores poles males condiciones de salú llaboral nes piscines municipales avilesines, siguen amontonándose n’Inspeición de Trabayu y los trabayadores siguen careciendo, de forma siguida, intoxicaciones, mancadures respiratories, de piel, etc.

El problema agrávase al considerar que los usuarios y usuaries de les piscines, munchos d’ellos neños y neñes de los cursos de natación entamaos polos colexos, comparten el mesmu espaciu que los propios trabayadores, polo que tamién se tán dando, frecuentemente, casos de mancadures de piel en neños y adultos usuarios. Y too ello, hasta’l puntu de que les piscines municipales avilesines yá tuvieron que ser evacuaes en dalguna ocasión.

D’esta forma, ye la mesma Salú Pública lo que podría tar en xuegu y lo qu’esixe l’adopción de midíes preventives, de forma inmediata.

El caberu incidente asocedió’l pasáu xueves 8 mayu, cuando al incorporase a los sos puestos de trabayu, los trabayadores negárense a abrir les instalaciones al públicu yá que la maquinaria ventilación y aireación taba parada.

Con borrina nel ambiente, una humedá del 100% y un fuerte golor a productos químicos, los trabayadores dan avisu al Xerente de la Fundación Deportiva Municipal, alvirtiendo de la insalubridad de les condiciones esistentes y sollertando de qu’esperiencies anteriores aconseyaben tomar midíes darréu, pa caltener la salú de trabayadores y usuarios.

Sicasí, dichu Xerente, faciendo casu omisu, ordenó abrir les instalaciones ensin tan siquier dar avisu al Serviciu de Prevención de Riesgos del Conceyu. Tou ello dio llugar a una nueva denuncia ante Inspeición de Trabayu, per parte de los trabayadores.

Por tou ello, los monitores municipales treslladaron a la conceyala de deportes, Ana Hevia, les sos esixencies:

-Puesta en marcha d’un protocolu d’actuación pa casos d’emerxencia.

-Siguimientu y controles médicos periódicos del estáu de salú de los trabayadores.

-Establecimientu d’un horariu llaboral que compaxine afayadizamente los tiempos de permanencia nes piscines colos necesarios momentos d’aireación, pa evitar que la esposición siguida de los trabayadores a les condiciones ambientales estremes que se dan nes piscines, siga provocando’l deterioru de la so salú.

Pa terminar, los monitores municipales alvirtieron a la conceyala Ana Hevia que, de siguir ensin atender les sos reivindicaciones, colos dictames y sentencies yá algamaes, van allegar a la vía penal pa depurar les responsabilidaes a que pueda dar llugar la repetición siguida d’esta triba d’accidentes.