Arcelor sanciona con 21 díes d’emplegu y sueldu al delegáu sindical de la CSI nel comité d’empresa de Xixón

ARCELOR SANCIONA CON 21 DÍES D’EMPLEGU Y SUELDU AL DELEGÁU SINDICAL DE LA CSI NEL COMITÉ D’EMPRESA DE XIXÓN.

La direición d’Arcelor sancionó con 21 díes d’emplegu y sueldu al delegáu sindical de la Corriente Sindical d’Izquierda nel Comité d’Empresa de Xixón.

El so “delitu” foi realmente grave: dar la cara pa defender los derechos llaborales de los y les trabayadores d’Arcelor. Denunciando los abusos empresariales, los retayos salariales, defendiendo’l repartu’l trabayu, la fin de les hores extres, los descansos llaborales, les nueves contrataciones, etc.

Y pa ello, cometió otru “delitu” inda peor: poner en marcha una práutica sindical participativa, horizontal y asamblearia. Dando-y la voz y la capacidá decisión a los mesmos y les mesmes trabayadores y, a la fin, prauticando un sindicalismu ensin claudicaciones, ensin corrupción y ensin traiciones.

Tanto’l nuesu compañeru represaliáu, como l’aición sindical del conxuntu la CSI n’Arcelor, son una torga pa la empresa y por eso intenten coartanos y amedrananos, remanando esta sanción como un escarmientu.

Pero, llueñe d’ello, dende la CSI vamos sofitar al nuesu compañeru ensin fisures y con tolos medios al nuesu algame. Y vamos defendenos de forma decidida, tantu nel tarrén sindical como nel xudicial.

¡LA REPRESIÓN LLABORAL NUN VA PARAR LA NUESA LLUCHA!.