Rueda de prensa de les Asamblees de trabayaores en llucha n’Asturies

MANIFESTACIÓN A LA ESCONTRA LOS DESPIDOS Y LOS PIESLLES D’EMPRESA.

Unos 100 representantes de les Asamblees de Trabayadores d’Asturies, realizaron una multitudinaria rueda de prensa, pa convocar la manifestación a la escontra los despidos y los pieslles d’empresa, que va tener llugar el próximu sábadu 17 mayu, a les 18:00 h., na plaza d’América d’Uviéu.

La rueda prensa realizóse énte la Presidencia’l Gobiernu asturianu, a la que, al traviés del Rexistru, pidieron una xunta urxente.

Dempués de faer un llamamientu al pueblu asturianu a participar masivamente nesta movilización, los voceros y voceres de los y les trabayadores fixeron públicu’l comunicáu que vien darréu:

Nos caberos años, podríen haber pesllao más de 4.000 empreses importantes n’Asturies, dempués d’esbardiar importantes subvenciones públiques y dexando na cai a miles de trabayadores. Gobiernos, parllamentos, conceyos y dirixentes de los grandes sindicatos, fueron cómplices d’una sangría que tornó Asturies nun ermu ensin otra alternativa que la emigración o la probitú.

Dexáronnos un paru insoportable, miles de families arruinaes y na cai, unes pensiones miserables y una mocedá ensin denguna triba futuru. La gran mayoría la clas obrera asturiana nin siquier trabaya o failo en trabayos precarios con sueldos que yá nun dan pa comer. Hasta los mesmos alimentos dexaron de tar garantizaos y miles de persones tienen que buscar la comida nos contenedores de basoria.

La xente muerre nos pasiellos de los hospitales o por falta calefaición y los neños y neñes esmorecen de fame nos colexos Asina de criminal ye’l sistema capitalista y asina de criminales y asesinos son quien tán nos poderes políticu y económicu, amasando fortunes ya espetando un sufrimientu al pueblu, que yá nun podemos siguir tolerando.

El Gobiernu y el Parlamentu d’Asturies siguen desapaecíos, votando lleis que solo garanticen los sos sueldos y sobresueldos y corriendo a salir na semeya pa xustificar un trabayu que nunca fixeron. La so inutilidá ye tan grande como la so caradura y el próximu 17 mayu vamos dir hasta’l Parllamentu asturianu a desixi-yos que faigan el trabayu pal que fueron escoyíos.

A los y les trabayadores nun nos queda otra salida que siguir cola nuesa llucha, porque nos va la vida nello. La nuesa y la de los nuesos fíos y fíes. Y tenemos que faelo con otra forma de defender los nuesos derechos, con otru sindicalismu.

Ensin que naide decida nin roble nada nel nuesu nome, ensin aceutar nin roblar nin un despidu nin un pieslle d’empresa más. Un sindicalismu ensin claudicaciones, ensin corrupción y ensin traiciones.

¡Vamos siguir na marraza y vamos ganar na cai lo que nos roben nos despachos!.