L’alcalde de Villaviciosa denuncia énte la xunta eleutoral a un militante de la CSI, acusándolu de facer pintaes a la escontra’l PP y la emigración llaboral

¡ASTURIES EN PIE!.

L’alcalde Villaviciosa, José Manuel Felgueres, del PP, denunció, énte la Xunta Eleutoral, a un militante de la Corriente Sindical d’Izquierda, acusándolu de la realización de pintaes a la escontra’l PP y la emigración llaboral, nos espacios empobinaos a la propaganda eleutoral.

Les pintaes qu’apaecieron nestos espacios eleutorales denunciaben el calter dictatorial de PP y convidaben a la llucha a la escontra’l paru y la forzosa emigración llaboral a la que’l PP conderga a miles d’asturianos y asturianes (“Nun emigres, llucha”…).

Esti militante de la CSI ye un trabayador precariu, que tamién ta siendo procesáu pola so participación nes lluches vecinales de Llugones a la escontra la implantación de la zona azul y ye solidariu con munches de les lluches obreres y sociales que tán teniendo llugar n’Asturies.

Pa ¡Asturies en Pie!, l’alcalde Villaviciosa tendría de dexar d’escorrer a los sos ciudadanos y ciudadanes del so conceyu y empezar a señalar y denunciar los pergraves casos de corrupción polos qu’el so propiu partíu, el PP, ta siendo investigáu y condergáu.

(Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).

(Semeya d’una de les pintaes apaecíes en Villaviciosa).